У Гародні вызвалены Антон Вайцехаў

10.04.2017, 08:34  |  Навіны » Палітыка

У Гародні вызвалены Антон Вайцехаў

 

Антон Вайцехаў, сябра Беларускай Хрысьціянскай Дэмакратыі, правёў 10 сутак адміністрацыйнага арышту ў ізалятары часовага ўтрыманьня па вуліцы Гая за ўдзел у акцыі супраць дэкрэту "аб дармаедах” у Гародні. Яго вызвалілі на дзьве гадзіны раней.

Увесь час вязень адчуваў, што яго падтрымліваюць з-за кратаў, кажа па вызваленні Антон Вайцехаў.

– Канешне, я адчуваў падтрымку. Мне было вельмі прыемна, калі мне прыносілі паштоўкі, перадачы. Дзякуючы ім я адчуваў, што пра мяне не забыліся. Я адчуваў сябе часткаю грамадства, я не адзін – нас шмат.

Антон Вайцехаў не выступаў, не крычаў на акцыях, ён проста раздаваў людзям нацыянальныя стужкі. Але суддзя Руслан Гурын пакараў яго арыштам.

Сустракаць Антона прыехалі аднапартыйцы і сябры, нягледзячы на тое, што вызваленне Антона прайшло на Вербніцу, у нядзелю.

Кажа Сяргей Верамеенка, калега па партыі.

– У гэтай справе ёсць дзве вельмі цікавыя рэчы. Па-першае, адна з прычын арышту чалавека – гэта тое, што ён раздаваў нацыянальныя бел-чырвона-белыя стужкі. Я лічу, што гэта не проста стужка – гэта сімвал, які аб’ядноўвае нас, беларусаў. І калі ўлада кідае чалавека ў турму за тое, што ён раздае нацыянальны сімвал, гэта паказвае якая гэта ўлада, чыя яна. Гэта не наша ўлада, а акупацыйная. А па-другое, нагадаю, што Антон быў кандыдатам на мінулых выбарах.

Агулам розныя тэрміны зняволення, звязаныя з акцыямі мірных пратэстаў у Гародні і вобласьці, за апошнія месяцы мела 13 чалавек.

Якуб Сушчынскі, Беларускае Радыё Рацыя Фота аўтара

Навіны па тэме