Павел Пракаповіч пераабраны кіраўніком БХД Мінскай вобласці

12.04.2017, 16:34  |  Навіны » Палітыка

Павел Пракаповіч пераабраны кіраўніком БХД Мінскай вобласці

 

8 красавіка ў Менску адбылася Менская абласная справаздачна-выбарная канферэнцыя аргкамітэту па стварэнні партыі Беларуская Хрысціянская Дэмакратыя. 

 

Перад пачаткам канферэнцыі сустаршыня аргкамітэта па стварэнні партыі Беларуская Хрысціянская Дэмакратыя Віталь Рымашэўскі і старшыня аргкамітэта Хрысціянска-дэмакратычнага руху Вольга Кавалькова правялі сустрэчу для новых сябраў і прыхільнікаў Беларускай Хрысціянскай Дэмакратыі.

У пачатку справаздачна-выбарнай канферэнцыі была прадстаўлена справаздача аб працы кіраўніка Менскай абласной арганізацыі аргкамітэту па стварэнні партыі БХД за справаздачны перыяд з 11 траўня 2015 па 8 красавіка 2017.

Кіраўніком Менскай абласной арганізацыі аргкамітэту па стварэнні партыі Беларуская Хрысціянская Дэмакратыя пераабраны Павел Пракаповіч. Таксама былі абраныя намеснікі старшыні, абласная Рада і рэвізійная камісія Менскай абласной БХД.

Як адзначыў абраны каардынатар БХД Міншчыны, асноўнымі праблемамі, з якімі давялося працаваць апошнія два гады, былі недастатковая інфармаванасць і адсутнасць камунікацыі з іншымі суб’ектамі кампаній, у якіх удзельнічаў аргкамітэт партыі БХД. На думку Паўла Пракаповіча, шэраг кампаній у Менскай вобласці маглі прайсці значна больш эфектыўна.

Таксама ўдзельнікі мерапрыемства абмеркавалі падрыхтоўку да ўрачыстага з’езду 27 траўня і падрыхтоўку да рэгістрацыі партыі БХД.

На заканчэнне мерапрыемства адбылася прэзентацыя кніг "100 асобаў Беларускай хрысціянскай дэмакратыі” і "Беларуская хрысціянская дэмакратыя”, якія былі прадстаўлены спадарыняй Вольгай Севярынец.

Навіны па тэме