Аргкамітэт «Чарнобыльскага шляху» падаў у суд на Менгарвыканкам за змяненне часу і месца акцыі

21.04.2017, 17:09  |  Галоўныя навіны, Палітыка

 

Аргкамітэт па правядзенні 26 красавіка традыцыйнай акцыі «Чарнобыльскі шлях" 21 красавіка падаў у суд Маскоўскага раёна Менска скаргу на дзеянні Менгарвыканкама, які змяніў час і месца правядзення мерапрыемства, піша БелаПАН.

Як паведаміў агенцтву адказны сакратар аргкамітэта па стварэнні партыі «Беларуская хрысціянская дэмакратыя» Дзяніс Садоўскі, скарга была складзена пры падтрымцы праваабарончага цэнтра "Вясна" (пазбаўлены афіцыйнай рэгістрацыі) і падпісана пяццю заяўнікамі акцыі: намеснікамі старшыні Партыі БНФ Ігарам Ляльковым, Беларускай партыі "Зялёныя" Дзмітрыем Кучуком, руху «За Свабоду» Юрыем Меляшкевічам, а таксама прадстаўнікамі аргкамітэта па стварэнні БХД Аляксандрам Кавальковым і кампаніі «Гавары праўду» Віталём Лакоткам.

Заяўнікі прасілі дазволіць збор удзельнікаў акцыі каля тэатра оперы і балета і наступнае шэсце па вуліцы Максіма Багдановіча да Чарнобыльскай капліцы ў раёне плошчы Бангалор. Аднак Менгарвыканкам змяніў фармат акцыі, дазволіўшы збор удзельнікаў на пляцоўцы каля прэзідыума Нацыянальнай акадэміі навук і шэсце да плошчы Бангалор. Пры гэтым быў зменены час пачатку мерапрыемства з заяўленых 18:00 на 14:00.

«Мы катэгарычна не згодныя з рашэннем Менгарвыканкама, таму вырашылі абскардзіць яго ў судзе. Змяніць месца і час акцыі ўлады маглі толькі па ўзгадненні з заяўнікамі», - адзначыў Садоўскі.

У скарзе ўказваецца на адсутнасць падставы для адмовы ў правядзенні масавага мерапрыемства ў адпаведнасці з заяўкай. Акрамя таго, у ёй гаворыцца, што права на мірныя сходы і свабоду выказвання меркавання можа быць абмежавана толькі пры захаванні строгіх умоў сапраўднай неабходнасці гэтых абмежаванняў і толькі ў мэтах дзяржаўнай бяспекі, грамадскага парадку, здароўя і маральнасці насельніцтва, правоў і свабодаў іншых асобаў.

19 красавіка заяўнікі «Чарнобыльскага шляху» перадалі ў Мінгарвыканкам патрабаванне змяніць час правядзення акцыі з 14:00 (прапанаваны менскімі ўладамі) на 18:00, як першапачаткова планавалі арганізатары. Пры гэтым яны выкліканы сёння ў выканкам на 17-й гадзіне.

Навіны па тэме