Справа зрушылася з месца?
Дзесяць год дачнікі і жыхары забытай Богам вёскі Мацавічы (Валожынскі раён) змагаліся за права на добрую дарогу і нармальны даезд да сваёй нерухомасці. Яны адпраўлялі калектыўныя лісты ў раён, звярталіся ў Мінскі аблвыканкам, нарэшце – у Камітэт дзяржаўнага кантролю. З упартасцю, вартай лепшага прымянення, улады адбіваліся ад усіх – пісьмовых і тэлефонных – просьбаў і скаргаў, пакуль не ўвайшла ў дзеянне рэспубліканская праграма ўпарадкавання мясцовых дарог. Пачалося асфальтаванне невялікага ўчастка дарогі Гіравічы – Стары Ракаў.
“З аднаго боку, гэта радуе, – сказала актывістка БХД Галіна Каржанеўская. – З другога – практыка зваротаў у дзяржаўныя органы з кожным годам робіцца ўсё менш эфектыўнай. Бо ўлада “заточана” на выкананне загадаў і цалкам ігнаруе патрабаванні знізу.
Застаецца пад пытаннем праблемны ўчастак ад новай кальцавой да Старога Ракава. Убухалі мільёны на бетонку, то, можа, знойдуць сродкі на кіламетр асфальту…”
