Берасцейскіх сябраў БХД затрымалі за салідарнасць з палітвязнямі
Зраніцы 17 студзеня ў Берасці былі затрыманыя сябра БХД Юрка Бакур, а таксама моладзевыя актывісты Іван Спасюк і Вікторыя Грышанава. Іх затрымалі каля будынку аблвыканкаму на плошчы Леніна за раздачу бюлетэняў пра падзеі Плошчы-2010 у Менску і салідарнасць з арыштаванымі кандыдатамі ў прэзідэнты і іншымі палітвязнямі.
Затрыманых даставілі ў Ленінскі раённы аддзел унутраных справаў. На ўсіх трох пачалі складаць пратаколы, але пасля 3-гадзіннага затрымання вызвалілі, так і не склаўшы іх.
“Міліцыянты збіраліся скласці пратакол наконт нашага затрымання, але пазней чамусьці вырашана было гэтага не рабіць. Усіх трох нас выпусцілі з пастарунку”, – распавёў Юрка Бакур, дадаўшы, што супрацоўнікі МУС сканфіскавалі друкаваныя матэрыялы.
