За надпіс «Луку на муку» на пастаменце Леніна ў Гародні — 525 тысяч штрафу
Рашэньнем Ленінскага раённага суду Гародні студэнтка гарадзенскага мэдунівэрсытэту Кацярына Герасімчык прызнаная вінаватай у дробным хуліганстве паводле арт. 17.1 Адміністрацыйнага кодэксу і пакараная штрафам у 15 базавых велічынь. Яе зьвінавацілі ў тым, што яна зрабіла на пастамэнце помніка Леніну надпіс «Луку на муку». Кацярына Герасімчык вінаватай сябе не прызнала.
У адміністрацыйнай справе Кацярыны Герасімчык перад гэтым адбылося ўжо два паседжаньні.
Міліцыянты, якія затрымалі Кацярыну Герасімчык і ейную сяброўку Вольгу Багданкевіч у ноч з 11 на 12 лютага побач з помнікам Леніна, у судзе не змаглі адназначна засьведчыць, што надпіс на пастамэнт нанеслі дзяўчаты. Абодва яны бачылі, што дзяўчаты падымаліся да пастамэнта, але ці яны гэта пісалі – міліцыянты ня бачылі.
Вольга Багданкевіч засьведчыла ў судзе, што яны падняліся на пастамэнт толькі дзеля таго, каб паглядзець, што там напісана. Побач з помнікам ляжаў балёнчык ад фарбы. Кацярына Герасімчык падабрала яго і паклала ў сваю торбу, гэтым самым пакінуўшы на ім свае адбіткі пальцаў.
Напярэдадні Кацярына Герасімчык заявіла, што ня ведае, якога рашэньня суду чакаць у сераду: “Але ўсё больш і больш я пачынаю думаць, што мне могуць даць суткі. Бо інакш навошта яны перакладаюць з дня на дзень гэтыя суды. Каб яны ведалі, што са мной рабіць, то і ня трэба было так надоўга ўсё гэта зацягваць”.
Праваабаронца Раман Юргель, які прысутнічаў на папярэдніх судовых паседжаньнях, заўважае, што ні ў судзе, ні на месцы здарэньня не было ўстаноўлена, ці маюць дачыненьне да гэтага надпісу затрыманыя дзяўчаты. Юргель перакананы, што гэты працэс палітычны і трэба чакаць палітычнага рашэньня.
Юргель: “Гледзячы на тое, што адбываецца ў Менску, а гэта, заўважце, зьмякчэньне абвінавачваньняў, перакваліфікацыя так званых масавых безпарадкаў на іншыя дзеяньні. І вось судзьдзя тут, канешне, глядзіць з аглядкай на Менск і на тыя праэсы, што там адбываюцца”.
Пры затрыманьні дзяўчаты мелі пры сабе налепкі “Малады фронт” і раздрукоўкі з надпісамі “Свабоду Кіркевічу!”, “Свабоду Няклееву!”, “Свабоду Фядуту!”. Такія налепкі былі расклееныя ў цэнтры Горадні.
За гэта Адміністрацыйная камісія пакаралі дзяўчатаў штрафамі ў памеры 10 мінімальных заробкаў кожную, нягледзячы на тое, што ніхто не засьпеў іх за тым, як яны клеілі гэтыя налепкі.
