У Менску адзначылі 20-годзьдзе Менска-Магілёўскай мітраполіі (Фота)
У Менску 19 чэрвеня ў сьвята Найсьвяцейшай Троіцы адбылася ўрачыстая літургія, прымеркаваная да юбілею Менска-Магілёўскай мітраполіі, якую 20 гадоў таму заснаваў бласлаўлёны папа Ян Павал ІІ. Сьвятая імша адбылася на плошчы перад касьцёлам сьвятых Сымона і Алены.
Нягледзячы на дождж, удзел у літургіі ўзялі сотні вернікаў, дзясяткі сьвятароў, усе беларускія біскупы – арцыбіскуп-мітрапаліт Тадэвуш Кандрусевіч, дапаможны менскі біскуп Антоні Дзям’янка, біскуп віцебскі Уладзіслаў Блін, гарадзенскі Аляксандар Кашкевіч, дапаможны біскуп пінскі Казімер Велікаселец. На жаль, узяць удзел у імшы па стане здароўя ня здолеў першы менска-магілёўскі мітрапаліт кардынал Казімер Сьвёнтак. Таксама на ўрачыстасьць завіталі і госьці зь іншых краін: з Расеі – арцыбіскуп маскоўскі Паоло Пэцы, з Латвіі – арцыбіскуп рыскі Збігнеўс Станкевічс, з Украіны – біскуп луцкі Маркіян Трафімяк і іншыя.
Не абмінулі ўрачыстую імшу і кіраўнік Беларускай грэка-каталіцкай царквы архімандрыт Сяргей Гаек ды прадстаўнік праваслаўнай царквы Аляксандар Шымбалёў. Узначаліў жа яе старшыня Папскай рады «Cor Unum» кардынал Рабэр Сара з Гвінэі.
Фота Надзеі Гацак.
