Гуляў на плошчы – хадзі ў міліцыю. Выклікаюць сябру БХД з Рагачова.
“Позву мне ўчора позна ўвечары прынесьлі два міліцэйскіх прапаршчыкі. Яны заўважна нэрваваліся, бо гэта было ўжо пасьля 22 гадзінаў. Прычым у позве не пазначана, да каго і ў якасьці каго мяне выклікаюць. Праз дзяжурнага я даведаўся, што да маёра Кухарэнкі”, – паведаміў Дашкевіч.
У Дзяніса як індывідуальнага прадпрымальніка на сёньня была заплянавана дзелавая паездка ў Гомель, набыты квіток. Зьвязана гэта з працай, з выкананьнем заказаў людзей.
“Я ніяк ня мог яе адмяніць, – кажа Дзяніс. – Калі міліцыі я быў так патрэбны, то можна было папярэдзіць мяне раней, а не блізу поўначы”.
Дашкевіч мяркуе, што выклік, хутчэй за ўсё, зьвязаны з маўклівай прагулкай маладых людзей, якая адбылася ў мінулую нядзелю на галоўнай плошчы Рагачову. Але ж ніякай забароны на прагулкі ў дзяржаве не існуе.
