У Менску пасля Чарнобыльскага шляху затрымалі актывістаў БХД
Пасля акцыі «Чарнобыльскі шлях» былі затрыманыя каля 40 чалавек. Усе яны былі дастаўленыя ў Савецкі і Цэнтральны РУУС, пра гэта Tut.by распавяла праваабаронца Наста Лойка.
За што канкрэтна былі затрыманыя ўдзельнікі акцыі, пакуль невядома, аднак актывіст «Маладога фронту» і сябар БХД Раман Васільеў паспеў паведаміць, што хутчэй за ўсё будуць складзеныя пратаколы па арт. 17.1. КоАП «Дробнае хуліганства».
Маладафронтавец і сябар БХД Мікола Дземідзенка дастаўлены ў Савецкі РУУС, піша spring96.org.
Як паведаміла актывістка незарэгістраванай арганізацыі Наста Палажанка, у судзе Савецкага раёна будуць судзіць Міколу Дземідзенку, Міхала Мускага і Рамана Васільева.
Таксама міліцыя затрымала Валянціну Дваракову, якая вітала дэманстрацыю з балкона сваёй кватэры на вуліцы Сурганава, міліцыя таксма затрымала і адпусціла пасьля складаньня пратакола па артыкуле 23.34 КоАП («парушэнне парадку арганізацыі і правядзеньня масавых мерапрыемстваў»).
Варта адзначыць, што перад заканчэннем акцыі адбылася кароткая гутарка намесніка начальніка ГУУС Мінгарвыканкама Ігара Яўсеева і экс-кандыдата ў прэзідэнты, сустаршыні БХД Віталя Рымашэўскага, які прасіў Яўсеева «абыйсціся гэтым разам без затрыманняў».
«Якія затрыманні? Няма ніякіх затрыманняў», — заявіў Яўсееў. На той момант з’явілася інфармацыя толькі пра затрыманых актывістаў расійскага “Яблока”, Яўсееў адзначыў, што яму пра гэтыя затрыманні нічога невядома.
