Актывісты “Еўрапейскай Беларусі” далучыліся да пікетаў БХД за Байкот (фота)
У Мінску 1 жніўня каля галоўнага ўваходу на Камароўскі рынак адбыўся чарговы пікет аргкамітэту па стварэнні партыі “Беларуская Хрысціянская Дэмакратыя” за Байкот “выбараў”. На гэты раз да пікету далучыліся актывісты кампаніі “Еўрапейская Беларусь”, у тым ліку былы палітвязень Сяргей Казакоў.
Мерапрыемства праходзілі пад пільнай увагай асоб у цывільным, у тым ліку здымалася на відэа. Падчас пікету актывісты БХД і “Еўрапейскай Беларусі” заклікалі грамадзян не хадзіць на выбары 23 верасня, а таксама збіралі подпісы за вызваленне палітвязняў.
Побач з пікетам БХД адбываўся пікет кампаніі “Гавары праўду!”, якая заклікала да ўдзелу ў выбараз, аднак менавіта пікет БХД прыцягнуў найбольшую ўвагу сілавых структур, якія на чале з намеснікам начальніка Савецкага РАУС Мінску спрабавалі забараніць яго правядзенне. Яны спасылаліся на тое, што, па заканадаўстве, падчас збору подпісаў за вылучэнне кандыдатам не маюць права збіраць подпісы за што-небудзь яшчэ, а таксама заклікаць грамадзян да байкоту выбараў.
Аднак ні яны, ні прадстаўніца акруговага выбаркама, якая прыбыла на месца правядзення пікетаў, не змаглі назваць канкрэтны артыкул, у якім бы пра гэта гаварылася. У сувязі з гэтым пікет БХД працягнуўся. Па словах Марыны Хоміч, дадзеная спроба разагнаць пікет з’яўляецца доказам таго, што беларускія ўлады баяцца менавіта байкоту “парламенцкіх выбараў”, а не тых, хто ў іх удзельнічае.
У сваю чаргу актывіст “Еўрапейскай Беларусі”, памілаваны фігурант “справы 19 снежня” Сяргей Казакоў адзначыў, што падтрымлівае любыя акцыі ў падтрымку зняволеных апазіцыянераў. “Палітвязням патрэбна наша салідарнасць. Яна іх вельмі падтрымлівае”, – сказаў ён.
