У Горадні прайшоў пікет за актывізацыю малога памежнага руху (фота)
У Горадні 2 сакавіка ў Румлёўскім парку адбыўся пікет аргкамітэту па стварэнні партыі “Беларуская Хрысціянская Дэмакратыя” за актывізацыю малога памежнага руху паміж Беларуссю і Польшчай.
Падчас пікету гарадзенцы размаўлялі з сябрамі БХД, задавалі ім пытанні пра малы памежны рух і гэтак далей. Як адзначылі актывісты, адкрыццё 50-кіламетровай зоны безвізавага праезду вельмі зацікавіла многіх грамадзян.
Нагадаем, што сябры гарадзенскай абласной арганізацыі Беларускай Хрысціянскай Дэмакратыі на чале з каардынатарам БХД у Мастах Змітром Кухлеем таксама распачалі онлайн-збор подпісаў пад зваротам да кіраўніка адміністрацыі прэзідэнта Беларусі з просьбай паскорыць рэалізацыю Дамовы аб МПР з Польшчай.
Петыцыя заклікае Адміністрацыю прэзідэнта нарэшце пачаць дзеянні для рэалізацыі дамовы аб малым памежным руху з Польшчаю. Усе подпісы пад неабходнымі дакументамі стаяць ужо больш за год, а руху няма.
Аўтары зварота “глыбока занепакоеныя зацягваннем беларускім урадам рэалізацыі Дамовы аб малым прымежным руху з Рэспублікай Польшчай”. Паводле іх словаў, “дамова закранае інтарэсы болей за мільён беларускіх грамадзян, якія пражываюць на прымежнай беларуска-польскай тэрыторыі”.
