Чыноўнікі - змагарам з беззаконнем у справе АЧС: Вы ўсё адно нічога не даб'ецеся

14.04.2014, 09:25  |  Галоўныя навіны, Рада Народных Дэпутатаў, Палітыка, Грамадства

Прадстаўнікі бярозаўскіх раённых уладаў падманулі мясцовых жыхароў, заявіўшы, што пытанне вылучэння пяцікіламетровых зонаў ад свінакомплексаў, на тэрыторыі якіх забароненае гадаванне свінняў, знаходзіцца не ў іх кампетэнцыі.

 

У сувязі з гэтым бярозаўцы былі змушаныя звярнуцца ў Дэпартамент ветэрынарнага нагляду Мінсяльгасхарчу. Пад зваротам падпісаліся 583 чалавекі. Аднак у Дэпартаменце адказалі, што 5-кіламетровыя зоны вылучаюцца мясцовымі райваканкамі на падставе ландшафту, размешчанасці гаспадарак і эпізаатычнай абстаноўкі. "Нас падманулі, увялі ў зман", - кажа ініцыятар звароту Аляксандр Аліхвер.

 

Нягледзячы на гэта, паводле яго словаў, прадстаўнік упраўлення сельскай гаспадаркі райвыканкаму Аляксей Жолцікаў у вуснай гутарцы паўторна заявіў актывістам, што пяцікіламетровыя зоны не ў кампетэнцыі раённых уладаў. Калі ж яму заявілі, што у Мінсяльгасхарчу кажуць адваротнае, чыноўнік сказаў: "Вы ўсё адно нічога не даб'ецеся!".

 

Аляксандр Аліхвер не збіраецца пакідаць гэтую справу проста так. "Улады пакінулі дзве свінафермы, а ў 17 вёсках сялянскіх свінняў павыразалі. Гэта наўпрост супярэчыць Канстытуцыі, паводле якой дзяржаўнай маёмасць, і прыватная роўныя. Тут жа чыноўнікі сабраліся і ўсё вырашылі, а людзей паставілі ўжо перад фактам", - дадаў ён.

Навіны па тэме