Мінжылкамгас: запланаваны на 2011 год смеццекамбінат пад Віцебскам пабудуюць як толькі, дык адразу

16.09.2014, 11:12  |  Галоўныя навіны, Рада Народных Дэпутатаў, Грамадства

Віцебскія сябры кампаніі "Народны кантроль” атрымалі чарговы і, пэўна, апошні, адказ з Міністэрства жыллёва – камунальнай гаспадаркі Рэспублікі Беларусь за №03-26-15/С-1926 па запыце-скарзе ад імя 945 падпісантаў звароту наконт будаўніцтва смеццеперапрацоўчага камбінату пад Віцебскам, пабудова якога была запланавана на 2011год.

 

З адказу Мінжылкамгасу,па даручэнні Савета Міністраў РБ, калі коратка абагульніць грунтоўную справаздачу, вынікае: як толькі, дык адразу…

 

Як толькі знойдзецца інвестар (пералік інвестарскіх кампаній, якія чамусьці альбо завалілі справу, і ім быў дадзены ад варот паварот, альбо аніяк не хочуць укладаць грошы ў гэты праект);

 

як толькі, галоўнае(!), Еўрапейскі банк рэканструкцыі і развіцця дасць крэдыт. Пра гэта, гаворыцца ў лісце, хадайнічае Віцебскі аблвыканкам.

 

А пакуль "канкрэтных прапаноў ад патэнцыйных інвестараў да цяперашнега часу не паступіла і крыніца фінансавання будаўніцтва не вызначана, у сувязі з чым канкрэтных тэрмінаў будаўніцтва смеццеперапрацоўчага прадпрыемства для Віцебска на ўвесь аб’ём адходаў, якія ўтвараюцца ў г. Віцебску, у дадзены момант назваць не прадстаўляецца магчымым”.

"Замест "прадпрыемства” далей гаворка ідзе пра новы палігон. І вось калі будзе пабудаваны гэты новы палігон, зразумела, зачыніцца стары (у лісце тэрміны не названыя), той, што ўжо у межах гораду, той, які існуе з 1972 году і на які штодня звозіцца, па інфармацыі з ліста Мінжылкамгасу, амаль 707 тон смецця. Той, які з’яўляецца бомбай маруднага дзеяння для абласнога цэнтру. Але мільганула прывідная надзея: "Дадзены праект (палігон-аўт.)плануецца ўключыць ў інвестыцыйную праграму 2015 года. Аб’ёмы фінансавання і тэрміны будаўніцтва будуць вызначаны пасля фарміравання бюджэту вобласці на чарговы фінансавы год "(цытата). Ліст падпісаны міністрам А.В. Шорацам”, - распавяла каардынатар віцебскага аргкамітэту БХД Таццяна Севярынец.

Навіны па тэме