Віцебскія ўлады не заўважылі парушэнняў у дзейнасці казацкіх фармаванняў
Каардынатар аргкамітэту па стварэнні партыі “Беларуская Хрысціянская Дэмакратыя” на Віцебшчыне Таццяна Севярынец атрымала з Галоўнага ўпраўлення юстыцыі Віцебскага аблвыканкаму адказ на калектыўны зварот у справе антыбеларускай дзейнасці казацкіх фармаванняў.
“Парушэнняў (у частцы дзейнасці незарэгістраваных казачых арганізацый), якія адносяцца да кампетэнцыі органаў унутраных справаў, не выяўлена”, – гаворыцца ў адказе за подпісам намесніцы старшыні ўпраўлення Таццяны Харушэўскай.
“Так што, казакі, у ружжо! Высвятляецца, што яны могуць рабіць, што хочуць, на чале са сваім галоўным кандыдатам”, – адзначыла Таццяна Севярынец.
Нагадаем, Таццяна Севярынец 27 ліпеня падала ў Віцебскую абласную пракуратуру заяву грамадзян Беларусі па факце дзейнасці ў рэгіёне прарасейскіх арганізацый. Заяву падпісалі жыхары Віцебска, Глыбокага, Оршы, Наваполацка, Віцебскага і Аршанскага раёну ды іншых. “Гэтыя арганізацыі бесперашкодна праводзяць свае мерапрыемствы ў Талачыне, Оршы, Полацку, Друцку, прыцягваюць да ўдзелу маральна не ўмацаваных беларусаў – падлеткаў, даюць ім у рукі баявую зброю, пра што сведчаць справаздачы і фотасправаздачы з мерапрыемстваў на іх сайтах”, – гаворыцца ў заяве
У сённяшняй сітуацыі падпісанты лічаць дзейнасць падобных арганізацый, іх кіраўніцтва, публікацый на іх сайтах небяспечнымi для тэрытарыяльнай цэласнасці Рэспублікі Беларусь, спрыяльнымі для распальвання нацыянальнай і рэлігійнай варожасці.
