Павал Севярынец, сябра Саюза Беларускіх Пісьменнікаў, аўтар кнігаў “Лісты з лесу”, “Брату”, “Люблю Беларусь” каментуе ганенні на літаратараў, распачатыя дзяржаўнымі ворганамі.

- Ганенні на беларускіх пісьменнікаў, аб’яднаных у легендарнуюю літаратурную арганізацыю – яскравае сведчанне таго, што рэжым проста з’язджае з глузду.

Па-першае (і галоўнае), гэта адкрытыя рэпрэсіі супраць носьбітаў беларускай мовы і культуры. У сталінскія часы, калі вынішчалі беларускую нацыянальную эліту, пісьменнікі былі галоўнай мішэнню.

Па-другое, гэта ганенні на іншадумства ў чыстым выглядзе. Людзей пераследуюць не за акцыі, нават не за палітычную пазіцыю – толькі за тое, што яны не ўхваляюць афіцыёзу.

Па-трэцяе, гэта выклік Еўропе. У еўрапейцаў культура, літаратура, нацыянальная мова заўжды стаялі ў шэрагу галоўных каштоўнасцяў. Тое, што робяць ідэолагі – рабская азіятчына.

Часам пяро больш трапнае, чым снайперская куля. А тых, хто пры слове “культура” хапаецца за рэвальвер, рана ці позна знойдуць на сметніку гісторыі.