12 лютага сябра Беларускай Хрысціянскай Дэмакратыі з Горак, пастар мясцовай царквы “Свабода ў Госпадзе” Пятро Маланачкін быў абавязаны даць тлумачэнні пракурору Магілёўскай ваеннай пракуратуры па ананімнаму абвінавачванню ў дачы хабару.

У ананімным лісце, што прыйшоў у Магілёўскую ваенную пракуратуру, гаворыцца, што хтосьці з Маланачкіных (спадар Пятро або ягоны 19-гадовы сын Ілля) далі хабар ваеннаму камісару Магілёва Хітруку, каб Іллю не забіралі ў войска.

Пракурор Магілёўскай ваеннай пракуратуры Будзько прыехаў сёння дамоў да Маланачкіных. Сын, студэнт Беластоцкага палітэхнічнага інстытута, таксама быў дома, бо цяпер у акадэмічным адпачынку.

Пастар сцвярдзіў, што хабару нікому ніколі не даваў, таксама, як і ягоны сын. А ананімку лічыць правакацыяй спецслужбаў, скіраванай на тое, каб запужаць яго і перашкодзіць удзельнічаць у маючых адбыцца мясцовых выбарах. Пятро Маланачкін, а таксама яшчэ некалькі вернікаў царквы “Свабода ў Госпадзе” збіраюцца актыўна ўдзельнічаць у выбарах.

.

- Я таксама пісьмова патрабаваў ад пракуратуры знайсці ананіма і паклёпшчыка і прыцягнуць яго да крымінальнай адказнасці, - адзначыў Маланачкін.