Больш за тысячу подпісаў выбаршчыкаў ужо сабралі ініцыятыўныя групы па вылучэнні кандыдатаў у дэпутаты хрысціянскіх дэмакратаў Віцебска.

Як паведаміла кіраўніца Віцебскай абласной арганізацыі БХД Таццяна Севярынец, збор подпісаў вядзецца актыўна, патэнцыяльныя кандыдаты пры неабходнай колькасці для рэгістрацыі па вылучэнні ў гарсавет 75 подпісаў, збіраюць значна болей. Так, больш за 100 подпісаў сабралі ўжо актывісты БХД Павал Папоў, Раіса Зарэчанская, Сяргей Уласаў.

Бадай, найбольш высокую планку паставіў сабе лідэр “Дыскусійнага клуба 24” Уладзімір Рамановіч – сабраць 2 тысячы подпісаў віцьбічаў. На дадзены момант у скарбонцы Уладзіміра каля 160 галасоў.

Нагадаем, у Віцебскай вобласці зарэгістраваныя 43 ініцыятыўныя групы ад беларускіх хрысціянскіх дэмакратаў - Беларуская Хрысціянская Дэмакратыя вылучыла на Віцебшчыне кандыдатаў у дэпутаты болей, чым усе астатнія партыі разам узятыя.