12 сакавіка актывісты Маладых Хрысціянскіх Дэмакратаў у цэнтры Менску раздавалі ўлёткі ў падтрымку Андруся Кашэўскага, які зараз адбывае 15 сутак зняволення на Акрэсціна.

На ўлётках быў заклік "Свабоду Кашэўскаму!" і гісторыя яго затрымання. Такім чынам актывісты МХД хацелі звярнуць увагу грамадскасці на гвалт і несправядлівасць рэжыму ў дачыненьні да "незалежных" беларусаў.

Паводле лідэра МХД Любові Каменевай, "улеткі разыходзіліся як гарачыя піражкі. Відаць, усё ж такі засталася ў беларусаў салідарнасць".

Нагадаем, сябра БХД са Смалявічаў Андрусь Кашэўскі, які збіраўся балатавацца ў Жодзінскі гарсавет і Менскі аблсавет, быў затрыманы вечарам 3 сакавіка ў Менскім метро.

Актывіста даставілі ў суд Ленінскага раёна, дзе ў той жа вечар адбыўся суд. Суддзя Навіцкая прысудзіла актывісту 15 сутак зняволення.

Паколькі Кашэўскі сам не паспявае своечасова падаць дакументы на рэгістрацыю, у панядзелак разам з юрыстамі гэтым зоймецца лідэр БХД Павал Севярынец.