Лідэр “Беларускай Хрысціянскай Дэмакратыі” Павал Севярынец падтрымаў зварот Рэспубліканскай грамадскай арганізацыі “Маці супраць наркотыкаў” адносна прапаганды гомасэксуалізму ў Беларусі.

Нагадаем, арганізацыя заклікае супрацьстаяць прапангадзе гомасэксуалізму ў краіне:“Мы супраць таго ладу жыцця, які яны нам старанна хочуць навязаць, бо гэты лад жыцця нясе смерць і разбурэнне. Зараз усё залежыць ад кожнага з нас, спыніцца гэты рух ці атрымае распаўсюд, як у Еўропе і Амерыцы. Заўтра будзе позна”.

- Лічу, што лідэрам беларускага грамадства варта прыслухацца да словаў тых, хто ратуе маладых беларусаў ад любых формаў залежнасці – наркатычнай, алкагольнай, гомасэксуальнай, - заявіў Севярынец у інтэрв’ю “МЫ”.

- Безумоўна, любы чалавек мае права на прыватнае жыццё. Але мая свабода заканчваецца там, дзе пачынаецца свабода іншага чалавека. Калі сэксуальная распуста альбо гомасэксуалізм адкрыта прапагандуецца як норма і навязваецца ў якасці “моды” – гэта ставіць пад пагрозу аснову грамадства: мараль і сямейныя каштоўнасці.

Павал Севярынец з недаўменнем успрыняў уключэнне арганізацыі геяў і лесбіянак у склад Асамблеі няўрадавых дэмакратычных аб'яднанняў Беларусі:

- На мой погляд, наяўнасць у шэрагах Асамблеі агрэсіўных агітатараў разбэшчанасці дыскрэдытуе нацыянальны і дэмакратычны рух. А што, калі заўтра ў супольнасць дэмакратычных НДА папросяцца арганізаваныя прыхільнікі легалізацыі прастытуцыі, эўтаназіі, педафіліі?..

- Сам грэшны, я не маю маю права асуджаць людзей за тое, што яны такія, якія ёсць, - зазначае Севярынец. – Але трэба адрозніваць грэшніка і грэх. Прапаганда распусты – гомасэксуальнай альбо гетэрасэксуальнай – ёсць выклік грамадству і не можа лічыцца станоўчай грамадскай дзейнасцю. Прапанову правесці ў наступным годзе ў Менску так званы “славянскі гей-парад” не магу расцэньваць інакш як правакацыю.

- У рэшце, - завяршае Павал Севярынец, - Божая любоў у стане змяніць тых, хто шчыра каецца. Веру, што такія людзі могуць збавіцца праз зварот да Хрыста.