«Чалавек вялікай веры і мужнасьці» — у Берасьці ўспаміналі Алеся Чаркашына
Вечарына памяці загінулага на Данбасе Алеся Чаркашына адбылася ў Берасьці. На яе прыйшлі родныя і сябры добраахвотніка.
Вядоўца вечарыны, сустаршыня БХД Павал Севярынец распавёў, што сродкі на помнік Алесю Чаркашыну хутка будуць сабраныя:
«Я з упэўненасьцю кажу, што гэты сьветлы хлопец пайшоў да Бога. Далучыўся да „Нябеснай сотні“, да тых людзей, якія аддавалі свае жыцьці за іншых. Гэта быў чалавек вялікай веры і мужнасьці. Вельмі многія людзі з розных куткоў Беларусі, Украіны, і нават з-за акіяну ўспамінаюць пра Алеся Чаркашына. У Кіеве на вуліцы Беларускай зараз ёсьць помнік змагарам за свабоду Міхасю Жызьнеўскаму і Алесю Чаркашыну. Вядомы беларускі скульптар Гэнік Лойка узяўся за выраб помніка Алесю Чаркашыну. І на гэты помнік зьбіраюцца людзі ў многіх краінах.»
Павал Севярынец распавёў, што на помнік сабрана ўжо тры зь неабходных чатырох тысяч даляраў. Наведнікі вечарыны таксама паўдзельнічалі ў складках на помнік свайму земляку.
Прысутным на вечарыне паказалі праект помніку, які мае быць усталяваны на гадавіну пахаваньня Алеся Чаркашына, а таксама паслухалі яго песьні, запісаныя сустаршынём БХД з Кобрыну Георгіем Дзьмітруком.
Журналісты пагутарылі з бацькам Алеся Мікалаем, які выказаў удзячнасьць за падтрымку сям’і:
«Падтрымка была з усіх бакоў. І маральная і матэрыяльная, людзі адгукнуліся.»
Паводле спадара Мікалая, апроч тэлефанаваньняў з КДБ неўзабаве пасьля пахаваньня Алеся, болей улады сям’ю не чапалі. А два тыдні таму яму патэлефанавалі прадстаўнікі аднаго зь дзяржаўных тэлеканалаў, якія хацелі прыехаць па інтэрвію:
«Хацелі сустрэцца, маўляў, размова будзе ні пра палітыку, ні пра што такое. Але я адразу сказаў — не. Не хачу зь імі ніякіх кантактаў, бо ведаю, у якім сьвятле потым гэта пакажуць».
33-гадовы беларус, былы старшыня берасьцейскай гарадзкой арганізацыі БХД Алесь Чаркашын ваяваў у складзе Добраахвотнага ўкраінскага корпусу Правага сэктару. 10 жніўня 2015 году ён быў цяжка паранены ў баі пад Белакаменкай у Данбасе і памер у шпіталі ў Запарожжы пасьля некалькіх тыдняў комы.
Ён быў пасьмяротна ўзнагароджаны ордэнам «Народны герой Украіны». Яму, ягонаму ўкраінскаму пабраціму Віталю Целяжэнку, а таксама беларусу Міхасю Жызьнеўскаму ў Кіеве ўсталяваны мэмарыяльны знак. Таксама беларусам, загінулым у канфлікце на Данбасе, прысьвечаны мэмарыяльны сайт, у Віцебску ў памяць аб іх сябры БХД высадзілі дрэвы.
Чаркашын пахаваны ў Берасьці, на разьвітаньне зьбіраліся сотні чалавек. КДБ цікавілася ў маці Чаркашына, хто дазволіў яго пахаваць такім чынам.
