Магілёўскі аблсуд адхіліў скаргу Алега Аксёнава на адміністрацыйны арышт
Суддзя Магілёўскага абласнога суда Ігар Зямцоў 6 красавіка
прызнаў правамерным пакаранне каардынатара аргкамітэта па стварэнні партыі
«Беларуская хрысціянская дэмакратыя» Алега Аксёнава, які адбыў 15-дзённы арышт
па абвінавачванні ва ўдзеле ў «Маршы нетунеядцев», перадае БелаПАН.
14 сакавіка суддзя суда Ленінскага раёна Магілёва Таццяна
Рубіс прысудзіла Аксёнава да 15 сутак адміністрацыйнага арышту па
абвінавачванні ў правядзенні 19 лютага несанкцыянаванай акцыі супраць дэкрэта №
3.
Падчас сённяшняга пасяджэння Аксёнаў хадайнічаў аб далучэнні
да матэрыялаў справы сваіх дадатковых заўваг. Як адзначаў актывіст, яшчэ на
пасяджэнні суда першай інстанцыі ён паказваў, што сведкі, а гэта супрацоўнікі
міліцыі, даюць супраць яго ілжывыя паказанні. Аднак, як пасля аказалася, гэта
не было адлюстравана ў пратаколе пасяджэння, нягледзячы на патрабаванні Аксёнава.
Заяўнік паказваў, што ён не карыстаўся мегафонам, у чым яго быццам бы выкрылі супрацоўнікі
міліцыі, і не заклікаў прайсці шэсцем па вуліцы Ленінскай да плошчы Зорак.
«Лічу тое судовае пасяджэнне палітычна заказным», – заявіў апазіцыянер.
Ён таксама адзначыў, што прыцягваць чалавека да адказнасці
за ўдзел у мірнай акцыі – антыканстытуцыйна і незаконна, бо гэта права даецца
грамадзяніну Беларусі Канстытуцыяй і замацавана ў міжнародна-прававых
дакументах. Спасылкі ж Магілёўскага гарвыканкама на тое, што для масавых акцый
вызначана нейкае адно месца, таксама з’яўляюцца парушэннем мясцовых уладаў на
свабоду сходаў, лічыць Аксёнаў.
Суддзя Зямцоў далучыў дапаўненні, перададзеныя Аксёнавым, і
без абвяшчэння перапынку адразу ж абвясціў рэзалютыўную частку свайго рашэння:
пастанову суда Ленінскага раёна Магілёва ад 14 сакавіка 2017 года пакінуць без
змены, а скаргу Аксёнава – без задавальнення.
«Звычайная чаканая сітуацыя, рашэнне было загадзя
падрыхтавана і ляжала ў тэчцы. Суддзя нават не рабіў перапынак для нарады.
Галоўнае, чаго я дасягнуў гэтым судовым пасяджэннем, што да справы далучылі
дадатак да скаргі, у якім тры патрабаванні», – заявіў БелаПАН Аксёнаў пасля
суда, падкрэсліўшы, што працягне абскарджваць судовае рашэнне.
