Віншуем з днём народзінаў Ірыну Багдановіч!

30.04.2017, 19:09  |  Навіны » Грамадства

Віншуем з днём народзінаў Ірыну Багдановіч!

 

30 красавіка святкуе свой дзень народзінаў паэт, літаратуразнаўца, кандыдат філалагічных навук, выкладчык БДУ і адна з сустаршыняў Беларускай Хрысціянска-Дэмакратычнай Злучнасці у 1991-1995 гадах Ірына Багдановіч.

Ірына Эрнстаўна Багдановіч нарадзілася 30 красавіка 1956 года ў Лідзе ў сям’і інжынераў. Ужо з двухгадовага ўзросту яна жыла ў Гомелі, дзе выхоўвалася ў дзядулі і бабулі з боку таты. Маці Ірыны памерла, калі дзяўчыне споўнілася 14 гадоў.

У 1973 годзе Ірына Багдановіч скончыла сярэднюю школу і распачала навучанне на гісторыка-філалагічным факультэце Гомельскага ўніверсітэта, якія праз пяць год паспяхова скончыла.

У 1978 годзе пераехала ў Мінск і паступіла ў аспірантуру пры Інстытуце літаратуры імя Я. Купалы Акадэміі навук Беларусі. Затым стала навуковым супрацоўнікам пры Акадэміі. У 1985 годзе была абаронена яе кандыдацкая праца па рамантычных матывах у творчасці Янкі Купалы, а праз чатыры гады Ірына Багдановіч, на той час і паэтэса, і перакладчыца, і навуковец, і літаратурны крытык стала сябрам Саюза Пісьменнікаў. Яе вершы друкаваліся ў часопісах "Полымя”, "Маладосць”, "Літаратуры і мастацтве”, альманаху "Дзень паэзіі”.

Першая кніга паэткі – "Чаравікі дзяцінства” ( 1985 год). Затым былі "Фрэскі” ( 1989), "Вялікдзень” (1993), "Сармацкі альбом” (2004), дзе ажывае ў паэзіі "даўняя і нядаўняя сармацка-рыцарская гісторыя Вялікага Княства Літоўскага і Рэчы Паспалітай, калі спавядаліся ідэалы вольнасці і веры, панаваў культ Айчыны, сагрэты і ўзвялічаны каханнем”; "Прыватныя рымляне” (2006). У 2016 годзе выдала кнігу сваёй паэзіі, перакладаў з польскай мовы і літаратуразнаўчых артыкулаў — «Залатая горка».

Напрыканцы 1980-ых і пачатку 90-ых ХХ стагоддзя Ірына Багдановіч стала актывісткай нацыянальнага Адраджэння і была цесна звязана з дзейнасцю хрысціянскай дэмакратыі.

1 чэрвеня 1991 гогда, калі адбылася ўстаноўчая канферэнцыя Беларускай Хрысціянска-Дэмакратычнай Злучнасці (БХДЗ), разам з Феліксам Янушкевічам Ірына Багдановіч прадстаўляла каталіцкі бок – і была абраная сустаршынёй БХДЗ.

Многія працы Ірыны Багдановіч прысвечаныя гістарычным постацям, звязаным з заснаваннем БХД і дзейнасцю хрысціянскіх дэмакратаў на пачатку ХХ стагоддзя. Сярод іх вядомыя святары і грамадска-палітычныя дзеячы Адам Станкевіч, Вінцэнт Гадлеўскі, Кастусь Стэповіч (Казімір Сваяк), Аляксандр Астрамовіч (Андрэй Зязюля), Язэп Германовіч (Вінцук Адважны) і інш.

Зараз Ірына Багдановіч жыве ў Мінску, выкладае студэнтам у БДУ.

 

Аксана Ючкавіч

Навіны па тэме