3 кастрычніка – разгляд скаргі на нерэгістрацыю Сацыяльна-хрысціянскага руху
3 кастрычніка а 10:00 у Вярхоўным судзе Беларусі адбудзецца разгляд скаргі Сацыяльна-хрысціянскага руху на адмову ў яго рэгістрацыі Міністэрствам юстыцыі.
«Спадзяемся, што рашэнне будзе прынятае законнае і адпавядаючае раўнапраўю розных арганізацый. Пакуль што мы маем сітуацыю, што адныя арганізацыі рэгіструюцца за пару дзён, а ў дачыненні іншых месяц вышукваюцца надуманыя зачэпкі для адмовы ў рэгістрацыі», – адзначыла кіраўнік СХР Вольга Кавалькова.
«Запрашаем на паседжанне журналістаў і проста неабыякавых грамадзян», – дадала яна.
Нагадаем, што гэта ўжо другая спроба рэгістрацыі Сацыяльна-хрысціянскага руху, які быў утвораны ў 2015 годзе як Хрысціянска-дэмакратычны рух. Нерэгістрацыя арганізацыі стала аб’ектам крытыкі афіцыйнага Мінску з боку Еўрапейскай народнай партыі.
