Павел Севярынец: Афіцыйны Кіеў мае паставіць Лукашэнку ультыматум
Сітуацыю з затрыманнем журналіста «Украінскага радыё» Паўла Шаройкі і высылкай дарадцы амбасады Украіны Ігара Скварцова сайту Charter97.org пракаментаваў сустаршыня аргкамітэту для стварэння партыі Беларуская хрысціянская дэмакратыя Павел Севярынец:
– Гэта самая сапраўдная антыўкраінская гістэрыя. Я думаю, што рэжым Лукашэнкі выконвае загад Крамля.
Справа Паўла Шаройкі сфабрыкаваная нязграбна і груба. Пасля таго, як улетку ўлады раскручвалі «справу патрыётаў», калі выявілася, што ўсе палітзняволеныя абсалютна невінаватыя, не застаецца ніякай веры КДБ.
Усе гэтыя заявы пра «сеткі шпіёнаў» шытыя белымі ніткамі і рассыпаюцца ў пыл. Афіцыйны Кіеў, які прадстаўляе велізарную краіну з падтрымкай еўрапейскай супольнасці, мае паставіць Лукашэнку ультыматум. Чара трывання ўжо перапоўненая.
На пачатку затрымліваюць украінскага патрыёта Паўла Грыба. У гэтай справе не грае ролі, адбылося затрыманне з дазволу беларускіх праваахоўнікаў або без іхняга дазволу. Гэта ўсё адно ганьба і скандал. Справа Паўла Грыба мела паставіць пад пытанне ўсё стасункі з рэжымам Лукашэнкі.
Такая чарада затрыманняў і дыпламатычны скандал – гэта спроба наламаць дроў і разбурыць усе стасункі. Я не выключаю, што за гэтым будзе які-небудзь крэдыт з Масквы. Калі чакаюцца нейкія грашовыя паступленні з Расеі – вартавыя сабакі рэжыму кідаюцца адпрацоўваць грошы. Гэта ганьба, бо на шалі пастаўленыя стасункі паміж двума братнімі народамі і лёсы людзей.
