Віталь Рымашэўскі: без свабоды СМІ немагчыма пабудаваць канкурэнтаздольную эканоміку
«З-за парушэння правоў чалавека ў нашай краіне Беларусь з’яўляецца сёння ізгоем ў міжнародных адносінах, наша эканоміка з’яўляецца неканкурэнтназдольнай, бо адсутнасць свабоды СМІ, свабодных выбараў, свабоды дзейнасці апазіцыі, незалежнай судовай улады дазваляе карумпаваным чыноўнікам і сілавым структурам душыць беларускі бізнэс, знішчаць аснову нашай незалежнасці, нашай эканомікі», – заявіў сустаршыня Беларускай хрысціянскай дэмакратыі Віталь Рымашэўскі.
«Без свабоды СМІ, без выканання правоў чалавека ў Беларусі немагчыма пабудаваць сучасную канкурэнтаздольную эканамічную мадэль. Беларуская хрысціянская дэмакратыя будзе рабіць усё магчымае, каб блакіроўка рэсурсу Хартыя’97 спынілася, а рэпрэсіі ў дачыненні да журналістаў спыніліся», – заявіў ён.
«Мы будзем заклікаць нашых міжнародных партнёраў пры любых кантактах з беларускімі ўладамі, як эканамічных, так і, у першую чаргу, палітычных звяртаць увагу на захаванне правоў чалавека ў нашай краіне. Рэсурс Хартыя’97 павінен быць разблакаваны! Ад беларускай салідарнасці таксама залежыць шмат, таму мы заклікаем усе палітычныя сілы нашай краіны стаць на абарону незалежных СМІ», – падкрэсліў сустаршыня БХД.
