Вольга Кавалькова заклікала выходзіць 29 снежня а 12:00 за Беларусь (відэа)

28.12.2019, 17:51  |  Галоўныя навіны, Палітыка

Вольга Кавалькова заклікала выходзіць 29 снежня а 12:00 за Беларусь (відэа)

Сустаршыня Беларускай хрысціянскай дэмакратыі Вольга Кавалькова выступіла з відэазваротам, у якім заклікала ўсіх удзельнічаць 29 снежня а 12:00 у акцыі ў абарону незалежнасці Беларусі на Кастрычніцкай плошчы ў Менску.

“Сёння перамовы аб паглыбленай інтэграцыі вядуць Лукашэнка і Пуцін, але калі мы паглядзім Канстытуцыі Рэспублікі Беларусь, то пабачым, што крыніцай суверэнітэту з’яўляецца беларускі народ”, - падкрэсліла сустаршыня БХД.

Яна адзначыла, што беларускі народ пазбаўлены права абіраць сваю ўладу. Таму дзейная ўлада не мае права прадстаўляць яго інтарэсы. У такім разе, заявіла Вольга Кавалькова, у беларусаў нічога не застаецца, акрамя як выказаць сваё меркаванне на мітынгу.

“Мы на гэта маем права. У нас ёсць канстытуцыйнае права на масавыя сходы”, - адзначыла палітык.

“Я прашу ўсіх, хто не баіцца. Усіх, для каго пытанне незалежнасці нашай краіны і пытанне адмовы ад інтэграцыйных працэсаў сёння важнае і баліць, прыходзіць заўтра а 12:00 на Кастрычніцкую плошчу, дзе мы можам пабачыць адно аднаго і выказаць уладам Беларусі сваё меркаванне, каб яны нас пачулі”, - заклікала Вольга Кавалькова.

Сустаршыня БХД таксама назвала героямі тых, хто выступае за незалежнасць Беларусі. Яна нагадала, што менавіта масавымі пратэстамі атрымалася спыніць дэкрэт пра “дармаедаў”.

“У нас добрае стаўленне да ўсіх суседзяў, але ні пра якое аб’яднанне гаворкі ісці не можа. … Людзі, якія прадаюць незалежнасць, - злачынцы, яны павінны несці адказнасць. А людзі, якія гэтую незалежнасць адстойваюць, павінны быць героямі, павінны быць узнагароджаныя. Але ў нашай краіне ўсё наадварот, бо інтарэсы народу ўладам не важныя. Ім важныя кішэні”, - адзначыла Вольга Кавалькова.

Яна нагадала, што Расея з’яўляецца краінай-агрэсарам, які пачынае канфлікты ў Грузіі, Малдове, Украіне.

“Ніякіх саюзаў з Расеяй не можа быць. Так, гандляваць. Так, сябраваць. Але не аб’ядноўвацца”, - падкрэсліла сустаршыня БХД і заклікала ўсіх выходзіць 29 снежня а 12:00 на Кастрычніцкую плошчу ў Менску.

Навіны па тэме