МХД пачалі збор подпісаў за каранцін у ВНУ і школах

19.03.2020, 13:33  |  Галоўныя навіны, Палітыка

МХД пачалі збор подпісаў за каранцін у ВНУ і школах

 

Маладыя хрысціянскія дэмакраты пачалі збіраць подпісы пад зваротам да Адміністрацыі кіраўнікі Беларусі, Савету міністраў і Міністэрства адукацыі з патрабаваннем увесці каранцін у навучальных установах у сувязі з каранавірусам.

Падпісаць зварот можна онлайн па спасылцы: https://forms.gle/ceNRxrCtGZ4NmqcF9

Тэкст звароту:

Звяртаемся да вас у сувязі з ростам выпадкаў распаўсюду каранавіруса ў Беларусі і суседніх краінах. Заклікаем увесці дыстанцыйнае навучанне ва ўсіх вышэйшых і сярэдніх спецыяльных навучальных установах, а таксама каранцін у сярэдніх і дашкольных навучальных установах.

Заклікаем Міністэрства адукацыі не перашкаджаць такім дзеянням ВНУ, асабліва з улікам таго, што Беларусь уступіла ў Балонскі працэс, які прадугледжвае аўтаномію вышэйшай школы. Лічым неабходным прадугледзець арганізацыю навучальнага працэсу без асабістых кантактаў – дыстанцыйна ў электронным выглядзе, а таксама магчымасць пераводу студэнтаў на індывідуальныя навучальныя планы.

Гэтая мера дазволіць запаволіць распаўсюд каранавіруса не толькі сярод студэнтаў, а таксама іх бацькоў і старэйшага пакалення, для якіх вірус з'яўляецца найбольш небяспечным. Гэта таксама створыць магчымасці своечасовага і адэкватнага рэагавання сістэмы аховы здароўя на магчымы рост колькасці захворванняў.

Просім:
- перанесці пачатак вясенніх канікулаў у сярэдніх адукацыйных установах (школах, гімназіях і ліцэях) на 23 красавіка 2020 года;
- рэкамендаваць усім вышэйшым і сярэднім спецыяльным установам увесці дыстанцыйнае навучанне з выкарыстаннем сучасных інфармацыйна-камунікацыйных тэхналогій (праз інтэрнет і з дапамогай мультымедыя);
- адмяніць і ўвесці забарону на любыя масавыя мерапрыемствы з удзелам студэнтаў і навучэнцаў;
- арганізаваць у навучальных установах гарачыя лініі для кансультацый студэнтаў, навучэнцаў і іх бацькоў.

Адказ просім накіраваць ініцыятару петыцыі, кіраўніку Маладых хрысціянскіх дэмакратаў Надзеі Гацак, на электронную скрыню nadziejahacak@gmail.com.

Грамадзяне Беларусі

Навіны па тэме