Палітзьняволеная Тацяна Канеўская 20 дзён правяла ў ШЫЗА. У яе значна пагоршылася здароўе
55-гадовую палітзьняволеную Тацяну Канеўскую на дваццаць дзён зьмясьцілі ў ШЫЗА гомельскай калёніі зь невядомай прычыны. У яе значна пагоршыўся стан здароўя.
У лісьце на волю Тацяна піша спачатку з гумарам: «Была ў штрафным ізалятары, трапілася гарачая пуцёўка. Спачатку на 10 дзён, потым вырашылі падоўжыць кантракт:). Прычына — пры сустрэчы. У прынцыпе, мне і рабіць нічога ня трэба было — усё самі :)».
Цяпер яна праходзіць лячэньне, бо «застудзіла суставы, ды і хрыбет даецца ў знакі». «Прышчэпкі я пакуль не рабіла, бо ў мяне няма сіл змагацца нават са звычайнай прастудай: слабы імунітэт, я моцна схуднела і слабасьць маю», — піша Тацяна.
У ШЫЗА ёй паведамілі, што яна мае статус «злосьніка» (злоснага парушальніка. — РС), гэта мае нэгатыўныя наступствы: Тацяну абмежавалі ў грашах на «атаварку», і «„плюшкі“, якія будуць раздаваць, мяне ня будуць тычыцца», піша яна. Дадаткова жанчыну пазбавілі доўгатэрміновага спатканьня.
«Праца мне не падабаецца, але адмова — гэта адразу ШЫЗА. Таму не хачу нікому даваць нагоды — хаджу на працу, шыю. Калектыў у нас жаночы, дружны, шмат розных людзей, ёсьць, вядома, і нармальныя», — зазначае асуджаная.
Інфармацыю яна атрымлівае зь беларускай тэлевізіі. «Але я ўмею бачыць і чуць праўду. І яна страшная», — напісала Тацяна.
Тацяна Канеўская — актывістка БХД, адна зь лідэрак кампаніі «Маці 328», якая змагалася супраць працяглых тэрмінаў для затрыманых паводле наркатычных артыкулаў. У 2020 годзе была даверанай асобай Сьвятланы Ціханоўскай. 8 жніўня 2020 году, напярэдадні выбараў, яе затрымала міліцыя. З тае пары жанчына ў вязьніцы. Увесну 2021 году суд пакараў Тацяну 6 гадамі пазбаўленьня волі за «масавыя беспарадкі».
Тацяна мае чатырох сыноў. Малодшаму Георгію — 14 гадоў. Увесну 2021 году сям’ю напаткала яшчэ адна бяда — Дзьмітрыя Канеўскага, сына палітзьняволенай, пасадзілі на 3 гады за нэгатыўны допіс пра міліцыю ў Telegram.
Цяпер другі сын Канеўскай, Аляксей, адбывае 30-дзённы арышт. Яго затрымалі за маску «Честные люди», абвінавацілі ў «правядзеньні несанкцыянаванага пікету» і далі 15 сутак. Але пасьля адбытага тэрміну Аляксей ня выйшаў на волю. Родныя даведаліся, што ён атрымаў яшчэ 15 сутак зь невядомай прычыны.
