Садоўскага адразу пасля допыту ў КДБ дапыталі ў контрвыведцы (Абноўлена)

09 лютага 2011 13:17  |  Галоўныя навіны

Сьпецслужбы не пакідаюць у спакоі адказнага сакратара БХД Дзяніса Садоўскага, 8 лютага яго выклікалі на допыт ў КДБ, на наступны дзень – у контрвыведку.
У контрвыведцы Садоўскага пратрымалі ўсяго каля 40 хвілінаў і ўзялі яшчэ адну падпіску пра неразгалошваньне. Прэс-службе БХД ён паведаміў, што выведнікаў таксама цікавілі выключна падзеі, зьвязаныя з Плошчай-2010.

 

У інтэрвію прэс-службе БХД Дзяніс Садоўскі распавёў: “Зраніцы патэлефанавалі з ваеннай контрвыведкі, папрасілі ў 15-00 прыйсьці на допыт. Прычым папрасілі прабачэньня, што ўчора цягалі на допыт ў КДБ, а сёньня да іх. Але яны ж мяне шукалі ўжо тры тыдні, дужа прасілі быць.”

 

На пытанне, чаму на яго думку, ён так пільна спатрэбіўся контрвыведцы, Садоўскі адказаў: “Таму што ў нас такая краіна. Відаць, хочуць запалохаць, ці самі баяцца БХД.”

 

Садоўскі пракансультаваўся з адвакатам пракансультаваўся, той сказаў, што на любыя нязручныя пытанні можна не адказваць. Дзяніс ужо скарыстаўся правам ня сьведчыць супраць сябе на допыце ў КДБ.

 

Нагадаем, толькі напярэдадні адбыўся допыт Садоўскага ў КДБ, а да гэтага сьпецслужбы вельмі пільна шукалі яго. У прыватнасьці падчас яго нядаўняй замежнай паездкі, Дзяніса 5 разоў шукалі з контрвыведкі па хатнім тэлефоне бацькоў.

 

Раней на допыт ў вайсковую контрвыведку ўжо выклікалі сустаршыню БХД Аляксея Шэіна. 

Болей навін