Папрашу я любові… (Верш)
Ва ўсе часы годна перажыць жыццёвыя цяжкасці людзям дапамагала не толькі малітва да Бога, але і творчасць. А асабліва натхняе спалучэньне: малітоўныя вершы ды сьпевы-малітвы. Па прапанове вядомай беларускай паэткі Галіны Каржанеўскай на нашым сайце мы друкем такія натхняльныя вершы нашых сяброў і прыхільнікаў. Сёння да вашай увагі верш полацкай паэткі Галіны Загурскай.
ПАПРАШУ Я ЛЮБОВІ…
Не хачу пераносіць благога
Я ў дзень новы з таго дня, што быў.
І прашу я любові у Бога
Для усіх, хто так мала любіў.
Для сябе папрашу прабачэння
Ў тых, каго палюбіць не змагла.
Нам нябёсы пашлюць суцяшэнне –
Ачышчальныя промні святла.
І надвор’е з настроем у змове:
Змрок сышоў, светлы ранак такі…
Папрашу я для ўсіх нас любові
Не на дзень, не на год – на вякі.
Галіна Загурская
