Дашкевіч зьвярнуўся ў пракуратуру з патрабаваньнем пакараць ілжэсьведкаў
Палітвязень Зьміцер Дашкевіч зьвярнуўся ў генэральную пракуратуру з патрабаваньнем прыцягненьня да адказнасьці за паказаньні ілжэсьведкаў з боку абвінавачаньня. Старшыня “Маладога Фронту” просіць пракуратуру пакараць Алега Малышава й Канстанціна Савіцкага, якія хлусьлівыя сьведчылі на судзе Дашкевіча й Лобава супраць маладафронтаўцаў.
Дашкевіч зьвяртае ўвагу пракуратуры, што паказаньні Малышава й Савіцкага былі хлусьлівыя й не адпавядалі рэчаіснасьці.
Дашкевіч выказавае упэўненасьць, што ўсе, хто ілжыва сьведчыў супраць яго і Эдуарда Лобава — тыя “нібыта пацярпелыя”, якія давалі паказаньні з суседняга пакоя — у будучыні абавязкова будуць справядліва пакараныя.
Лідэр Маладога Фронту падкрэсьлівае, што ніводнае з прад’яўленых яму й Лобаву абвінавачаньняў не адпавядае сапраўднасьці.
“Усе добра ведаюць, што я й Лобаў даўно займаемся палітычнай дзейнасьцю і нападаць на кагосьці за дзень да выбараў, “падпалу Рэйхстага”, нам было б вельмі нявыгадна”, — заяўляе Дашкевіч.
Канстанцін Савіцкі й Алег Малышаў — гэтак званыя “пацярпелыя” — ў зале суда так і не з’явіліся. Яны адказвалі на пытаньні з-за сценкі.
18 сьнежня 2010, за дзень да вулічнай акцыі ў Менску, на маладафронтаўцаў Дашкевіча й Лобава напалі хуліганы на чале з Малышавым і Савіцкім. Паказаньні сьведкаў кажуць аб невінаватасьці Дашкевіча й Лобава. Аднак пасьля суду Дашкевіч атрымаў два гады калёніі агульнага рэжыму, Лобаў — чатыры ў калёніі ўзмоцненага рэжыму.
Нагадаем, на судзе Дашкевіча й Лобава абарона прасіла цалкам апраўдаць абвінавачваных маладафронтаўцаў з-за недаказанасьці віны. А судзьдзя Алена Шылько адмовіла адвакатам у прадастаўленьні часу для падрыхтоўкі да судовых спрэчак. Суд таксама адхіліў шэраг хадайніцтваў абароны аб дасьледаваньні пацярпелых, а таксама аб правядзеньні генатыпічнай экспэртызы.
