Галоўная » Навіны » У Тацяны Севярынец у судзе над Рымашэўскім зрывалі з шыі бел-чырвона-белую стужачку

У Тацяны Севярынец у судзе над Рымашэўскім зрывалі з шыі бел-чырвона-белую стужачку

05 мая 2011 16:48  |  Навіны

У будынку суда Фрунзенскага раёна Менска, дзе праходзіць суд над сустаршынём БХД, былым кандыдатам у прэзідэнты Віталём Рымашэўскім, адбыўся непрыемны інцыдэнт. Маёр міліцыі Максім Грышчанка напаў на маці зьняволенага сустаршыні БХД Паўла Севярынца Тацяну Яўгенаўну і пачаў зрываць бел-чыровна-белую стужачку, завязаную ў яе на шыі. Пры гэтым ён грубіў жанчыне і пагражаў затрыманьнем.

 

У адказ Тацяна Севярынец таксама схапіла яго за гальштук і загадала зьняць, калі ёй нельга мець стужачку на шыі. У выніку жанчыну выціснулі ўніз і прымусілі зьняць стужачку, сказаўшы паводле яе шматлікіх просьбаў “калі ласка”.

 

Пазьней, калі Тацяна Яўгенаўна ізноў павязала стужачку, Грышчанка і іншы міліцыянт Дзьмітры Курыльчук па мянушцы Егіпет ізноўку прычапіліся да яе. Пакінуць жанчыну ў спакоі прымусіў толькі іх начальнік палкоўнік Ігар Яўсееў. На конт гэтага здарэньня Тацяна Севярынец падала скаргу ў гарадскую пракуратуру горада Менска.

 

У інтэрвію прэс-службе БХД Тацяна Яўгенаўна сама распавяла пра здарэньне наступнае:

 

“У будынку суда я павязала на шыю бел-чырвона-белую стужачку, каб прыўзьняць настрой сабе і ўсім нашым паплечнкам. Але калі маёр Грышчанка пабачыў гэта, дык азьвярэла наляцелі на мяне: “Зьняць!”, “Зьняць стужачку!” і пачаў раз’юшана дзёргаць мяне за гэтую стужачку. Я тады гэтага Грышчанку сама схапіла за гальштук – “І вы здымайце, мне таксама не падабаецца ваш гальштук!” Ён стаў мяне штурхаць і выпіхваць на лесьвіцу ўніз. Сабралася шмат народу мяне абараняць. Міліцыянты выштурхалі мяне на паверх ніжэй, але пасьля я ўсёткі дамаглася ад іх  ветлівага “здыміце, калі ласка” і на нейкі час зьняла.

 

Гэта ўсё я апісала ў скарзе, якую падпісала шмат сьведак здарэньня і якую я адразу завезла ў менскую гарадскую пракуратуру. Паводзiны прыспешнiкаў улады неадэкватныя, яны хочуць выслужцца перад гэтаў уладай,  бягуць паперад бацькi у пекла.  Для iх бел-чырвона-белае як чырвоная анучка для быка, кiдаюцца на яе, як вар’яты.“


Міліцыянты з ГУУС Менгарвыканкама, “тры багатыры” Ігар Яўсееў, Максім Грышчанка і Дзьмітры Курыльчук-Егіпет добра вядомыя шмат якім сьвядомым беларусам, якія ўдзельнічаюць у акцыях пратэста. Яны заўсёды праяўляюць вялікі імпэт у разгонах акцыяў апазіцыі ды нават мірных малітваў за Беларусь і проста шалеюць, калі бачаць бел-чырвона-белыя сьцягі. Хрысьціяне з аргкамітэту БХД заклікаюць да ўзмоцненай малітвы за гэтых людзей, за вызваленьне ад духа злобы, іх пакаяньне і навяртаньне.

Болей навін