Віталь Рымашэўскі падаў касацыйну скаргу на вырак суду (Фота)
Экс-кандыдат у прэзыдэнты Беларусі, сустаршыня аргкамітэту па стварэньні партыі “Беларуская хрысьціянская дэмакратыя” 30 траўня падаў касацыйную скаргу на несправядлівы і палітычна матываваны прысуд, вынесены яму 20 траўня.
Нагадаем, што 20 траўня суд Фрунзэнскага раёну Менска прысудзіў Віталя Рымашэўскага да двух гадоў пазбаўленьня волі ўмоўна.
“Пракурор назваў адзінай зьмякчаючай акалічнасьцю наяўнасьць непаўнагадовай дачкі на ўтрыманьні. Безумоўна, я рады штодня бачыць гэтую “акалічнасьць”, быць разам са сваёй сям’ёй. Але для мяне ўмоўны тэрмін – гэта не свабода. Гэтыя ўмовы я адчуваў на сабе пасьля вызваленьня зь СІЗА КДБ. Беларускія дэмакратычныя палітыкі нават без умоўнага прысуду могуць у любы момант апынуцца за кратамі”, – адзначыў сустаршыня БХД пасьля выхаду з залі суду.
