Флэшмоб «У абарону жыцця» прайшоў у Менску (Фота)
У суботу, 28 траўня, у менскім парку імя Горкага адбыўся флэшмоб «У абарону жыцця». У акцыі, прымеркаванай да Дня дзіцяці, прынялі ўдзел каля 30 чалавек, палова з іх — дзеці. Цяжарныя жанчыны і маленькія дзеці раздавалі менчукам шарыкі, запрашэнні на канцэрт «У абарону жыцця», каляровыя стужкі. Акцыя працягвалася некалькі гадзінаў.
Флэшмоб быў прысвечаны Міжнароднаму дню абароны дзяцей, які ва ўсім свеце адзначаецца 1 чэрвеня. Арганізатары флэшмоба хацелі нагадаць, што абароны патрабуюць не толькі дзеці, якіх мы бачым, але і тыя, якія яшчэ не нарадзіліся і знаходзяцца ва ўлонні маці. Такім чынам удзельнікі акцыі папярэджвалі аб недапушчальнасці абортаў.
«Мы хацелі засведчыць, што цяжарнасць — гэта супер, а дзеці — гэта класна! — адзначае ўдзельніца акцыі Наталля Бачышча. — Было вельмі цікава пагутарыць з людзьмі, падараваць ім усмешкі».
Канцэрт «У абарону жыцця» адбудзецца 1 чэрвеня ў 19.00 у КЗ «Мінск». Квіткі можна набыць у касах залы ці ў распаўсюджвальнікаў.
