Супрацоўнікі КДБ вярнулі сваякам Яўгена Васьковіча зламаны ноўтбук
Супрацоўнікі бабруйскага КДБ вярнулі сваякам асуджанага сябра аргкамітэту па стварэнні партыі “Беларуская Хрысціянская Дэмакратыя” Яўгена Васьковіча зламаны ноўтбук, канфіскаваны пры арышце ўзімку гэтага году. У сваякоў палітвязня гэты факт выклікаў абурэнне, бо да канфіскацыі ноўтбук працаваў. На зварот у КДБ яны атрымалі адказ: “забірайце такі, або не атрымаеце ніякі”.
Родныя Яўгена Васьковіча аддалі ноўтбук спецыялістам, якія прыйшлі да высновы, што кампутар быў зламаны тупым прадметам, верагодна, адвёрткай. У яго моцна пашкоджаныя мацярынская плата і жорсткі дыск.
“Мы будзем пісаць скаргу на дзеянні КДБ. Зразумела, што ў нашай краіне ў судзе нельга дамагчыся праўды, але скаргу ўсё адно мы будзем падаваць”, – адзначыў адказны сакратар БХД Дзяніс Садоўскі.
У ноч з 16 на 17 кастрычніка 2010 году ў Бабруйску зрабілі напад на будынак КДБ. Яўгена Васьковіча затрымалі 17 студзеня ў Магілёве на наступны дзень пасьля яго ўдзелу ў акцыі салідарнасьці зь беларускімі палітвязьнямі. Пракурор даводзіла, што дзеяньні падсудных маглі прывесьці да зьнішчэньня ўсяго будынка КДБ. Страты маглі скласьці блізу двух мільярдаў рублёў. Рэальныя ж страты ад нападу склалі 253 тысячы рублёў, і гэтыя грошы ўжо выплацілі. Яўген Васьковіч заявіў, што не шкадуе аб учыненым. Ён назваў сябе ліцьвінам і дадаў, што яго сьвяты абавязак — бараніць нацыянальныя беларускія каштоўнасьці. “За іх я ўмерці гатовы, бо жыцьцё кароткае, а радзіма вечная”, казаў хлопец. Яго не спалохаюць цяжкасьці, і ён з годнасьцю іх пройдзе. Скончыў свой кароткі выступ Васьковіч воклічам: “Жыве Беларусь!”. Яўгена Васьковіча суд прысудзіў да сямі год зьняволеньня калёніі ўзмоцненага рэжыму.
