Павел Севярынец: Гатовых удзельнічаць у акцыях пратэсту пакуль менш, чым гатовых гэтыя пратэсты падаўляць…
Інтэрвію сустаршыні па стварэнні партыі БХД Паўла Севярынца газеце “Народная Воля”, прысвечанае акцыям, што адбыліся 19 чэрвеня роўна праз шэсць месяцаў пасля прэзідэнцкіх выбараў.
19 чэрвеня ў цэнтры Мінску прайшло малітоўнае шэсце жанчын, апранутых у бела-чырвоную вопратку, прысвечанае паўгоду жорсткага разгону мірнай акцыі пратэсту на плошчы Незалежнасці. У гэты ж дзень у цэнтры Наваполацка затрымалі трох актывістаў аргкамітэту па стварэнні партыі “Беларуская Хрысціянская дэакратыя”, якія збіраліся ўзяць удзел у маршы нязгодных, прымеркаваным да паўгадавіны прэзідэнцкіх выбараў.
Пракаменціраваць гэтыя падзеі “Народная Воля” папрасіла аднаго з сустаршыняў па стварэнні партыі Паўла Севярынца, асуджанага на 3 гады “хіміі”, які зараз знаходзіцца ў Віцебску ў чаканні выканання прысуду:
— Паказальна, што гэтыя акцыі ніхто не рыхтаваў загадзя. Яны прайшлі стыхійна. Малітва за палітвязняў ідзе з сэрца людзей, для гэтага ніякай арганізацыі не трэба.
— Вядома, што малітвы за палітвязняў распачаліся адразу пасля 19 снежня. Чаму зараз сілавікі звярнулі асаблівую ўувагу на гэтыя акцыі?
— Па-першае, зараз адчуваецца сацыяльная напружанасць. Улада імкнецца кантраляваць і разбураць усялікі супраціў. Гэта было відавочна і на нядаўніх акцыях маўчання, якія прайшлі нядаўна па ўсёй Беларусі. Улада гэтага апасаецца. Пакуль, асабліва ў рэгіёнах, гэтыя пратэсты малаколькасныя. Таму ў тым жа Наваполацку не абыйшлося без затрыманняў. На сённяшні дзень многія не задаволены ростам цэн і зніжэннем заробкаў. Але пакуль гатовых удзельнічаць у акцыях пратэсту менш, чым гатовых гэтыя пратэсты падаўляць…
