Таццяну Севярынец прызналі вінаватай за арганізацыю малітвы (фотарэпартаж)

11 ліпеня 2011 17:34  |  Галоўныя навіны

Суд Кастрычніцкага раёну горада Віцебска прызнаў кіраўніцу абласной арганізацыі БХД Таццяну Севярынец вінаватай ў арганізацыі несанкцыянаванага шэсця 3 ліпеня, калі больш за 100 віцьбічаў, пляскаючы ў ладкі, прайшлі па цэнтральных вуліцах горада і многія з іх прынялі ўдзел у малітве за Беларусь каля Успенскага сабора.

 

Суддзя Яўген Буруноў сказаў, што на ўласныя вочы пабачыў на апэратыўным відэа, як Таццяна Севярынец арганізоўвала малітву за палітвязьняў, прызнаў яе вінаватай у частцы 2 артыкула 23.34 КоАП і прысудзіў Таццяне Яўгенаўне, як арганізатарцы “несанкцыянаванага шэсця” і малітвы штраф у памеры 20 базавых велічыняў (700 000 беларускіх рублёў).

 

У суд Таццяна Севярынец прыйшла, падрыхтаваўшыся да “сутак”. Прадстаўніком Таццяны Яўгенаўны ў адміністрацыйным працэсе выступіў яе сын Павал Севярынец, які сам асуджаны за Плошчу-2010 і чакае зараз накіравання “хімію”.

 

У судзе праглядзелі відэазапісы, зробленыя аператыўнікамі на плошчы Перамогі, падчас руху людзей па вуліцы Леніна і ўласна падчас малітвы каля Еўфрасіннеўскага крыжа на Ўспенскай горцы. Павал Севярынец наконт гэтых відэазапісаў сказаў, што на іх бачнае толькі парушэньне закону з боку міліцыянтаў, якія іх здымалі: на відэа чутна нецэнзурная лаянка супрацоўнікаў, а пляскаць у ладкі і тым больш, маліцца, законам пакуль не забаронена. 

 

Падтрымаць Таццяну Яўгенаўну прыйшлі сябры па партыі, калегі па дэмакратычнаму руху і вернікі. Заключнае слова Таццяны Севярынец было сустрэта воплескамі.

 

Таццяну Севярынец прызналі вінаватай за арганізацыю малітвы (фотарэпартаж)

Таццяну Севярынец прызналі вінаватай за арганізацыю малітвы (фотарэпартаж)
Таццяну Севярынец прызналі вінаватай за арганізацыю малітвы (фотарэпартаж)
Таццяну Севярынец прызналі вінаватай за арганізацыю малітвы (фотарэпартаж)

 

Фота: Радыё Свабода

Болей навін