Svobodné Bělorusko заклікала ўлады Чэхіі змагацца за беларускіх палітвязняў

07 верасня 2011 16:43  |  Галоўныя навіны

Чэшская недзяржаўная арганізацыя „Svobodné Bělorusko“ („Свабодная Беларусь”) заклікала змагацца за павагу правоў чалавека і палітвязняў у Беларусі міністра ўнутраных спраў ЧР Яна Кубіцу, міністра замежных справаў ЧР Карла Шварцэнберга, міністра юстыцыі ЧР д-р Іржы Поспішыла і прэм’ер-міністра Пятра Нечаса.

У тэксце заявы, між іншым, гаворыцца:

“Паважаны спадар прэм’ер-міністр, паважаныя міністры ўрада Чэшскай Рэспублікі, мы просім і заклікаем вас, як прадстаўнікоў найвышэйшага выканаўчага органа Чэшскай Рэспублікі, каб вы ад беларускага ўрада і сваіх беларускіх калег патрабавалі:

1. Неадкладнае вызваленне ўсіх палітычных зняволеных.
2. Выкананне беларускага заканадаўства і забеспячэнне яго выканання ў турмах.
3. Павагу да правоў вязняў, замацаваных у беларускай прававой сістэме.
4. Спыненне выкарыстання бессэнсоўных незаконных пакаранняў.
5. Спыненне пераследу зняволеных і жорсткага абыходжання з імі.
6. Забеспячэнне прафесійнай медыцынскай дапамогі і рэабілітацыі для Змітра Бандаренкі.”

Заклік тычыцца ўсіх палітвязняў, а асабліва Змітра Дашкевіча, Мікіты Ліхавіда і Змітра Бандаренкі.

Заклік падтрымалі 22 чалавекі, сярод якіх некалькі пастараў пратэстанцкіх цэркваў, настаўнікаў, прадпрымальнік і пенсіянеры.

Зыходны тэкст заявы можна знайсці на сайце „Свабоднай Беларусі” http://www.svobodnebelorusko.cz/aktuality/vyzva-k-zasazeni-se-o-dodrzovani-lidskych-prav-politickych-veznu-v-belorusku