Юры Клімовіч: ў рэгіёнах ніхто не хоча быць клоўнам
Кіраўнік аргкамітэту па стварэнні Партыі “Беларуская Хрысціянская Дэмакратыя” па Гомельскай вобласці Юры Клімовіч лічыць, што галоўнай мэтай палітычнай кампаніі 2012 году павінна стаць дэлігітымізацыя рэжыму ў вачах простых грамадзян. На яго думку, дасягнуць гэта атрымаецца толькі праз байкот “выбараў”.
– Што лепш рабіць дэмакратычным сілам: ісці на выбары ці байкатаваць іх?
– Толькі актыўны байкот. У ніякім разе нельга вылучацца ў якасці кандыдатаў, бо тым самым адбудзецца мабілізацыя электарату. Недапушчальна заклікаць людзей на выбары, мабілізаваць іх на выбарчыя ўчасткі. Разам з тым я лічу, што на стадыі збору подпісаў можна скарыстацца тымі магчымасцямі, якія яна дае, для агітацыі, раздачы ўлётак і гэтак далей.
Пакуль жа самае галоўнае, што трэба рабіць – інфармаваць насельніцтва пра палітвязняў, бо вельмі нязначная частка беларусаў ведае, што яны ў Беларусі ёсць. І ўжо бліжэй да “выбараў” трэба пачынаць агітацыю. У дзень жа галасавання мы павінны прысутнічаць у якасці назіральнікаў, каб засведчыць, колькі людзей насамрэч прыйдзе на ўчасткі, каб паказаць грамадзянам, што рэжым – нелігітымны. У гэтым наша галоўная задача і да яе мы павінны імкнуцца. Калі мы будзем ставіць некалькі задачаў – агітацыю, піяр – то тады мы не здолеем чагосьці дасягнуць.
– А як да выбараў ставяцца гомельскія дэмакратычныя сілы?
– Большасць лічыць, што ісці на “выбары” няправільна. Дый простыя грамадзяне ўдзелу ў “выбарах” не зразумеюць. Разам з тым лідэры некаторых партый з Менска заклікаюць сваіх актывістаў да ўдзелу, але я сумняюся, што яны здолеюць закрыць ўсе выбарчыя акругі. Тут на месцы мала хто хоча выступаць у ролі клоўна і ісці на “выбары”.
