Віталь Рымашэўскі назваў дзве прычыны дазволу акцыі на Дзень Волі (відэа)
Лідар «Беларускай хрысціянскай дэмакратыі» Віталь Рымашэўскі называе дзве мажлівыя прычыны, чаму беларускія ўлады дазволілі Дзень Волі.
«Улады дазволілі мерапрыемства 25 сакавіка з адной простай прычыны: яны ведаюць, што гэтае свята ўсё адно будзе адзначацца. У любым выпадку ў вулічным фармаце акцыя адбудзецца – будзе дазвол ці не. Яны вымушаныя ісці на дазвол, магчыма, не жадаючы лішніх кпінаў з боку Еўрапейскага Звязу».
Паводле Рымашэўскага, дазвол можна назваць саступкаю, якой беларусы дамагаліся цягам амаль 20 апошніх гадоў, выходзячы на вулічныя акцыі пратэсту. Летась Менгарвыканкам дазволіў мітынг у парку Дружбы народаў, але забараніў шэсце.
Правакацыі з боку праваахоўных органаў і людзей у цывільным мажлівыя. «Але я думаю, што на сённяшні дзень гэта не выгадна ім, бо занадта шмат ужо было бязглуздых учынкаў зроблена, якія брутальна парушаюць правы чалавека», – кажа палітык. Віталь Рымашэўскі спадзяецца, што затрыманняў не будзе, і ад імя арганізатараў абяцае зрабіць усё дзеля таго, каб акцыя была мірная.
