У Бабруйску спецслужбы спрабуюць дыскрэдытаваць БХД (фота)
У Бабруйску спецслужбы распачалі кампанію дыскрэдытацыі мясцовых дэмакратычных актывістаў.
Гэтак, на дзверах і вокнах крамы, у якой працуе абласная каардынатарка аргкамітэту па стварэнні партыі “Беларуская Хрысціянская Дэмакратыя” Таісія Кабанчук, 19 красавіка з’явіліся улёткі з яе фота, і абразлівым тэкстам пра яе. Улёткі былі прымацаваныя налепкамі БХД. Пазней улёткі з’явіліся ўжо і на доме, у якім пражывае Таісія Кабанчук.
За дзень да таго ў пад’ездзе мясцовай дэмакратычнай актывісткі Галіны Смірновай невядомыя раскідалі па паштовых скрынях і наляпілі на сцены паклёпнкіцкія ўлёткі пра яе і яе сям’ю. Да сценаў яны былі прымацаваныя зноў-такі налепкамі БХД.
Дадзеныя спробы дыскрэдытацыі Таісія Кабанчук лічыць помстай за тое, што яна “засвяцілася” на мітынгу на Дзень Волі 25 сакавіка. “Гэтым займаюцца тыя, хто не рэгіструе нашу партыю і іншыя арганізацыі, тыя, хто баіцца грамадска актыўных людзей. Пасля таго, што здарылася з Галінай Смірновай, я ўжо чакала, што яны дабяруцца і да мяне, як яны гэта зрабілі ў мінулым годзе. У сваіх дзеяннях яны ўжо апусціліся да ўзроўню дзіцячай пясочніцы”, – адзначыла каардынатарка БХД.
Таісія Кабанчук паведаміла, што хутчэй за ўсё на гэтыя дзеянні будзе падаваць заяву ў міліцыю.
