Аргкамітэт кампаніі байкоту заклікае стаць відавочцамі народнага байкоту
Аргкамітэт Аргкамітэт кампаніі байкоту заклікае ўсіх неабыякавых грамадзян Беларусі стаць відавочцамі народнага байкоту і ўвайсці ў склад участковых выбарчых камісій. Тэкст заявы падпісалі Аляксандр Казулін, Аляксандр Атрошчанкаў, Генадзь Федыніч, Дзмітрый Усс, Віталь Рымашэўскі і Віктар Івашкевіч. Прапнуем вашай увазе поўны тэкст заявы:
Аргкамітэт кампаніі байкоту заклікае ўсіх неабыякавых грамадзян Беларусі
СТАЦЬ ВІДАВОЧЦАМІ НАРОДНАГА БАЙКОТУ
Ні адны выбары ў Беларусі за апошнія 15 гадоў не праводзіліся без грубага парушэння нормаў міжнароднага права. Пачынаючы з моманту фарміраваньня камісій да моманту «падліку» галасоў і фіксацыі яўкі выбаршчыкаў, улада парушае права беларусаў на сумленныя і справядлівыя выбары. Але тое, што відавочна для нас з Вамі, неабходна зрабіць відавочным для большасьці беларусаў.
Кампанія байкоту пачынае вылучэньне ў склад участковых выбарчых камісій прадстаўнікоў – відавочцаў народнага байкоту.
Мы заклікаем грамадзян Беларусі да 5 жніўня 2012 году вылучацца ў склад участковых камісій шляхам падачы заявы ад імя грамадзян Беларусі. Заява павінна быць падпісаная ня менш як 10-цю грамадзянамі, якія валодаюць выбарчым правам і пражываюць на адпаведнай тэрыторыі. Усе, хто будзе вылучаны шляхам збору подпісаў, – стануць прадстаўнікамі простых грамадзянаў Беларусі. Адмаўляючы ім, камісія парушае правы тых людзей, хто паставіў подпіс у падтрымку. Гэта выдатная магчымасьць распавесьці знаёмым, суседзям пра стаўленьне ўладаў да іх, пераканаць далучыцца да байкоту.
Таксама Аргкамітэт прапануе вылучацца ў склад участковых камісіяў ад грамадзкіх арганізацый. Уся неабходная інфармацыя пра вылучэньне чальцоў выбарчых камісій ёсьць на афіцыйным сайце байкоту.
Вылучаючы прадстаўнікоў у склад участковых камісіяў, мы ставім уладу перад дзьвюма кепскімі выбарамі: прапусьціць незалежнага прадстаўніка ў склад участковай камісіі і атрымаць незалежнага назіральніка з правам голасу, які будзе фіксаваць рэальную яўку выбаршчыкаў, парушэньні закону, альбо адмовіць – і тым самым пацьвердзіць, што свабодных і празрыстых выбараў у краіне няма. Масавая адмова незалежным прадстаўнікам – сама па сабе ўжо пацьвярджэньне адсутнасьці свабодных выбараў у краіне.
http://www.bajkot.info/
Аргкамітэт кампаніі байкоту
Аляксандр Казулін
Аляксандр Атрошчанкаў
Генадзь Федыніч
Дзмітрый Усс
Віталь Рымашэўскі
Віктар Івашкевіч
