Суд не задаволіў скаргу Алега Аксёнава на дзеянні КДБ
Як паведаміў магілёўскі каардынатар аргкамітэта па стварэнні партыі “Беларуская хрысціянская дэмакратыя” Алег Аксёнаў, суд Ленінскага раёна Магілёва не 18 снежня задаволіў яго скаргу на пастаноўку на прафілактычны ўлік у КДБ.
Разгляд скаргі доўжыўся два дні: “17 снежня мы размаўлялі ў залі суда з супрацоўнікамі КДБ, якія апраўдвалі пастаноўку мяне на ўлік у КДБ за” дзейнасць ад імя незарэгістраванай арганізацыі “. Яны лічаць, што ў Беларусі існуе палітычная партыя” Беларуская хрысціянская дэмакратыя “, не зарэгістраваная належным чынам у Міністэрстве юстыцыі. Я ж адмаўляў, што такая партыя ёсць, і існуе толькі аргкамітэт па стварэнні партыі. Так што можна сцвярджаць, што існаванне БХД прызнала нават КДБ “, – сказаў Аксёнаў.
Па словах актывіста, 18 снежня ў судзе апынулася даведка пра тое, што ён рабіў за апошнія два гады. “Суд зачытаў гэтую даведку і вынес прадказальнае рашэнне: у скарзе на дзеянні супрацоўнікаў КДБ адмовіць, а рашэнне аб пастаноўцы мяне на ўлік у КДБ пакінуць у сіле, паколькі гэта ў кампетэнцыі КДБ”, – паведаміў Аксёнаў.
Ён не згодны з такім рашэннем суда і мае намер абскарджваць сваю пастаноўку на ўлік надалей. “Пакуль я не маю на руках пастановы суда – чатырохстаронкавы дакумент я атрымаю заўтра. І адразу ж буду абскарджваць гэтае рашэнне ў Магілёўскім абласным судзе, паколькі сваю пастаноўку на ўлік па такой фармулёўцы лічу незаконнай”, – сказаў Аксёнаў.
Варта адзначыць, што БХД чатыры разы праводзіла ўстаноўчыя з’езды і чатыры разы падавала дакументы на рэгістрацыю партыі. Ва ўсіх выпадках у рэгістрацыі партыі Мінюст адмовіў. Цяпер БХД спрабуе зарэгістраваць рэгіянальныя грамадскія аб’яднанні, у назве якіх прысутнічаюць словы “хрысціянская дэмакратыя”.
