Палітвязня Васьковіча трымаюць у ізаляцыі
Ад Яўгена Васьковіча больш за месяц няма лістоў.
Пра гэта сайту charter97.org распавяла Тамара Васьковіч, бабуля палітзняволенага актывіста аргкамітэта па стварэнні партыі «Беларуская хрысціянская дэмакратыя» Яўгена Васьковіча.
«Вось ужо другі месяц я нічога не ведаю пра лёс свайго ўнука. Ніякіх лістоў ад яго не прыходзіла. Маці і цётка Яўгена таксама не атрымлівалі вестак», – адзначыла бабуля палітвязня.
Нагадаем, Яўген Васьковіч быў асуджаны разам з Арцёмам Пракапенкам і Паўлам Сырамалотавым. Яго прысудзілі да 7 гадоў зняволення за спробу падпалу дзвярэй бабруйскага аддзялення КДБ. У верасні мінулага года Павел Сырамалотаў выйшаў на волю пасля таго, як напісаў прашэнне аб памілаванні на імя Лукашэнкі. Яўген Васьковіч і Арцём Пракапенка адмаўляюцца пісаць такое прашэнне.
