У Брэсце суд аштрафаваў актывіста БХД Уладзіслава Бароўскага
Як паведаміў БелаПАН праваабаронца Раман Кісляк, камісія па справах непаўналетніх адміністрацыі Маскоўскага раёна Брэста падвергла 18-гадовага Уладзіслава Бароўскага штрафу ў памеры 0,5 базавай велічыні (50 тыс. рублёў).
Такое рашэнне прынята камісіі 4 красавіка пасля разгляду матэрыялаў адміністрацыйнай справы Бароўскага па ч. 1 арт. 23.34 КаАП (удзел у правядзенні несанкцыянаванага мерапрыемства).
“Справа разглядалася ў камісіі па справах непаўналетніх, так як на момант затрымання і складання пратаколу Бароўскаму было яшчэ 17 гадоў”, – удакладніў Кісляк.
Актывістаў аргкамітэта па стварэнні партыі “Беларуская хрысціянская дэмакратыя” Бароўскага, Яўгена Хазіахметава і Андрэя Шарэнду супрацоўнікі міліцыі затрымалі 18 сакавіка на вуліцы Маскоўскай побач з паркам Воінаў-інтэрнацыяналістаў, дзе ў гэты дзень быў вывешаны бел-чырвона-белы сцяг на ўстаноўленым на пастаменце бронетранспарцёры.
Усе трое былі дастаўлены ў Маскоўскі РАУС Брэста.
У міліцыі ў іх узялі тлумачэнні. Бароўскаму, які не адмаўляў, што вывешваў бел-чырвона-белы сцяг на бронетранспарцёры, а таксама Хазіахметаву, які заявіў, што не ўдзельнічаў у акцыі, а толькі яе фатаграфаваў, уручылі позвы з’явіцца 20 сакавіка ў Маскоўскі РАУС. Шарэнда паведаміў міліцыі, што ён проста гуляў у гэтым раёне горада.
Праз некалькі гадзін затрыманых адпусцілі з аддзела ўнутраных спраў без складання пратаколаў аб адміністрацыйным правапарушэнні.
20 сакавіка ў Маскоўскім РАУС у дачыненні да Бароўскага і Хазіахметава былі складзеныя пратаколы па ч. 1 арт. 23.34 КаАП.
22 сакавіка суд Маскоўскага раёна Брэста прысудзіў Шарэнду да штрафу ў 25 базавых велічынь (2,5 млн. рублёў), Хазіахметава – да 10 (1 млн.). Пратакол у дачыненні да Шарэнды быў складзены без яго ўдзелу, і справа ў судзе было разгледжана ў яго адсутнасць.
“Улады адмыслова стварылі сітуацыю, калі любое публічнае выказванне пратэстнага думкі становіцца несанкцыянаваным, так як атрымаць дазвол на яго практычна нерэальна”, – падкрэсліў Кісляк.
