Як
зменяцца беларуска-нарвежскія адносіны пры новым ўрадзе і наколькі
актуальнае беларускае пытанне ў Нарвегіі, карэспандэнты Тэлеграфа
вырашылі паразмаўляць з Улаўг Вервік Болестад, новаабраным дэпутатам
ад Хрысціянскай народнай партыі (КрФ) , лідэрам партыі ў рэгіёне
Ругаланн.

Telegraf.by: Наколькі добра вы знаёмыя з сітуацыяй у Беларусі?

Болестад: Пяць гадоў таму нарвежскі ўрад прапанаваў партыям пачаць супрацоўніцтва з партыямі ў Беларусі. І КрФ вырашыла супрацоўнічаць з Беларускай хрысціянскай дэмакратыяй. І
з тых часоў мы падтрымліваем пастаянныя кантакты з БХД: разам
вывучаем, як праходзяць розныя працэсы ў Нарвегіі і Беларусі, прапануем
сваю дапамогу, у тым ліку ў пытаннях развіцця дэмакратычных механізмаў, дзелімся вопытам удзелу ў выбарах і гэтак далей.

Telegraf.by: Як вы лічыце, сітуацыя ў Беларусі за апошні час палепшылася ці пагоршылася?

Болестад: На маю думку, сітуацыя ў Беларусі становіцца ўсё больш небяспечнай. Я сама была ў Мінску тры разы, але цяпер мне адмаўляюцца выдаваць візу. Я думаю, што гэта звязана з маімі кантактамі з БХД. Мне здаецца, што Лукашэнка вельмі моцна заклапочаны тымі зменамі, якія адбываюцца ў свядомасці беларусаў. І ў сувязі з гэтым ён трымае краіну ў “яжовых рукавіцах”. І я асцерагаюся за людзей у Беларусі, якія жывуць у закрытай сістэме, у якіх няма магчымасці выказаць сваё меркаванне. Мне гэта не падабаецца.

Дэмакратычныя партыі ў Беларусі павінны падрыхтавацца да таго, што рэжым можа загінуць у любы момант. Ім неабходна выбудаваць дэмакратычныя механізмы ў краіне, інакш да ўлады зноў можа прыйсці аўтарытарны кіраўнік.

Telegraf.by: Ці можа Нарвегія штосьці прапанаваць Беларусі?

Болестад: Самае важнае – гэта пабудаваць адносіны паміж урадамі, каб мы маглі ўзаемадзейнічаць адзін з адным. Нарвегія можа аказаць дапамогу Беларусі ў нафтагазавай сферы, у тым ліку ў адукацыі беларускіх спецыялістаў. Акрамя таго, нарвежскія прадпрыемствы могуць інвеставаць у Беларусі. У нас ёсць для гэтага сродкі і магчымасці.

Беларусі варта звярнуць сваю ўвагу на Захад, у тым ліку на такія краіны, як Нарвегія. Я не заклікаю Беларусь уступіць у Еўрапейскі саюз, але звярнуць сваю ўвагу на Захад.

Telegraf.by: Ці зменіцца палітыка Нарвегіі ў дачыненні да Беларусі пры новым ўрадзе?

Болестад: У Нарвегіі вельмі шырока абмяркоўваецца беларускае пытанне, сітуацыя ў Беларусі. І нарвежскім палітыкам не падабаецца тое, што адбываецца ў Беларусі. Яны
лічаць, што людзі ў краіне павінны быць свабодныя, і выкарыстоўваюць
розныя магчымасці, каб заклікаць Лукашэнку вызваліць свой народ. Мы ведаем сітуацыю з паслом Швецыі, які быў высланы з Беларусі, і нам гэта не падабаецца. І я думаю, што новы ўрад зверне больш пільную ўвагу на сітуацыю ў Беларусі.