У Мёрах затрымалі незалежных журналістаў
Міліцыянты затрымалі незалежных журналістаў у Мёрах. Здымачную групу, у складзе якой
былі Сяргей Кручкоў, Анастасія Рэзнікава і аператар Аляксандр Пацееў, адвезлі ў
пастарунак.
Міліцыянты патлумачылі, што яны знаходзіліся ў «забароненай
зоне вайсковых вучэнняў», паведамляе прэс-служба Беларускай асацыяцыі журналістаў.
На самай справе, тэлежурналісты прыехалі ў Мёры, каб
падрыхтаваць рэпартаж аб адключэнні цяпла ў кватэрах мясцовых жыхароў.
Паводле неафіцыйных звестак, цяпло тысячам жыхароў адключылі
не праз аварыю, а праз вайсковыя зборы, якія праходзяць у гэтым раёне.
Дзяжурны РАУС у Мёрах адмовіўся пацвердзіць затрыманне
журналістаў, аднак яны самі паведамілі пра гэта па тэлефоне.
Па інфармацыі на
19.30, іх адпусцілі з РАУС, узяўшы тлумачэнні, але настойліва парэкамендавалі
выехаць з Мёраў і сказалі, што пры наступнай спробе нешта зняць у журналістаў
будуць больш сур’ёзныя праблемы.
Здымачную групу адканваявалі да межаў горада.