Новаабраны абласны савет просяць патлумачыць сваю пазіцыю наконт Малога памежнага руху (фота)
Грамадскія актывісты кампаніі “За малы памежны
рух!” просяць патлумачыць пазіцыю новаабранага Гарадзенскага аблсавета наконт
пагаднення аб Малым памежным руху з Польшчай і Літвой.
Ініцыятары кампаніі накіравалі зварот 104
грамадзян з просьбай арганізаваць сустрэчу з кіраўніцтвам новаабранага
Гарадзенскага аблсавета. Яны просяць патлумачыць пазіцыю дэпутатацкага корпуса
наконт бязвізавага руху ў прымежных з Еўразвязам рэгіёнах.
Шэраг апазіцыйных прэтэндэнтаў у дэпутаты ў
Гарадзенскай і Берасцейскай абласцях у сваіх праграмах падкрэслівалі
неабходнасць паскарэння бязвізавага руху з ЕС. Аднак праўладныя кандыдаты, з якіх
цалкам сфармаваны дэпутацкі корпус у саветах 27-га склікання, гэтае пытанне ў
сваіх выбарчых кампаніях абмінулі і не выказалі свайго стаўлення да бязвізавага
руху з Еўрасаюзам. Пры гэтым вялікая колькасць грамадзян прымежных рэгіёнаў зацікаўлена
ў хуткім ўвядзенні Малога памежнага руху з Польшчай і Літвой.
Аўтары звароту просяць разгледзець на наступнай
сесіі аблсавета пытанне аб зацягванні рэалізацыі беларускім бокам пагаднення аб
МПР. Яны таксама звяртаюцца з просьбай хадайнічаць перад прэзідэнцкай
адміністрацыяй, Міністэрствам замежных спраў Беларусі аб перадачы польскаму
ўраду ноты аб гатоўнасці беларускага боку да ўвядзення ў дзеянне Дамовы аб МПР.
Адзін з ініцыятараў кампаніі Зміцер Кухлей
падкрэслівае: “Савет абавязаны ўзняць на парадак дня дзяржаўных органаў пытанне
аб бязвізавым руху ў прымежных рэгіёнах. Большасць грамадзян хацела б наведваць
сваіх суседзяў без візавых бар’ераў. Згодна з Законам “Аб мясцовым
кіраванні і самакіраванні” савет “удзельнічае
ў абмеркаванні пытанняў рэспубліканскага значэння, якія закранаюць інтарэсы
адпаведнай тэрыторыі, уносіць па іх свае прапановы ў адпаведныя дзяржаўныя
органы і іншыя арганізацыі”.
Кампанія “За малы памежны рух” ладзіцца хрысціянскімі
дэмакратамі ў рамках грамадскай ініцыятывы “Рада народных дэпутатаў” з 2012 г. Асноўнай
задачай кампаніі з’яўляеца павелічэнне інфармаванасці жыхароў прымежных рэгіёнаў аб
сутнасці і перавагах Дамовы аб Малым памежным руху з краінамі Еўразвязу.