Павел Севярынец накарміў усіх украінскім баршчом (фота)
У Мінску 9 верасня прайшла дабрачынная акцыя «Мы любім
украінскі боршч», мэта якой – сабраць сродкі ў дапамогу параненым падчас
узброенага канфлікту ўкраінцам.
У акцыі ўдзельнічалі як простыя грамадзяне, так і лідары ды
прадстаўнікі розных партый і арганізацый: першы кіраўнік постсавецкай Беларусі
Станіслаў Шушкевіч, старшыня Партыі БНФ Аляксей Янукевіч, намеснік старшыні
кампаніі «Гавары праўду» Андрэй Дзмітрыеў, паэт і пісьменнік Славамір Адамовіч
ды іншыя.
Суп, прыгатаваны рэжысёркай Вольгай Нікалайчык і грамадскай
актывісткай Юліяй Сцяпанавай, раздаваў усім жадаючым сустаршыня аргкамітэту па
стварэнні партыі «Беларуская хрысціянская дэмакратыя» Павел Севярынец.
Паводле яго словаў, падчас акцыі атрымалася сабраць больш за
700 даляраў, якія пасля кансультацый з украінскімі калегамі будуць перададзеныя
параненым і бежанцам.
Фота Надзеі Гацак
