У Маладзечне на правацэнтрысцкіх пікетах агітавалі за пенсійную рэформу і рэформу ЖКГ (фота)
2 верасня ў Маладзечне сябры Беларускай хрысціянскай дэмакратыі і Аб’яднанай грамадзянскай партыі правялі супольны Правацэнтрыскі пікет у падтрымку кандыдата ад АГП па 72-й Маладзечанскай акрузе Віталя Жыбуртовіча, на якім таксама агітавалі за неабходнасць пенсійнай рэформы і супраць павышэння пенсійнага ўзросту.
Пікет прайшоў каля крамы “Белмаркет”, паведаміў каардынатар БХД у Маладзечне Раман Ганчароў.
Аналагічны пікет 1 верасня, што прайшоў насупраць Мінскага абласнога тэатра лялек “Батлейка”, быў прысвечаны рэформам ЖКГ. “Вельмі уражвае добры настрой насельніцтва. Людзі падыходзяць, дзякуюць і нават гатовыя ахвяраваць на тое, каб ў Беларусі была Хрысціянская дэмакратыя”, – адзначыў Раман Ганчароў.
31 жніўня на пікеце на скрыжаванні вуліц Талстога і Хмяльніцкага таксама раздавалі ўлёткі і знаёмілі маладзечанцаў з Беларускай Хрысціянскай Дэмакратыяй, збіралі подпісы ў абарону прадпрымальнікаў і супраць указа №222.
